Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Van ghierecheden te scuwene in rade. C. XVIII.

 
ELc sal voersien mede
 
Dat ommate ghierechede
 
Niet en come / vroech no spade /
 
In hem no in sinen rade.
1475
Ghierecheyt / als Paulus seyt /
 
Es wortel van alre quaetheyt1.
 
Dander redene es dan
 
Dat ghierecheyt verdriven can
 
Alle claerheyt uten sinne
1480
En̄ alle quaetheyt bringhen inne.
 
Seneca spreect van desen:
 
Die meeste plaghe die mach wesen
 
Den mensche gheboren in /
 
Dat es een ghierech sin;
1485
Want hi sorghet nacht en̄ dach
 
Hoe hi meer ghecrighen mach /
 
Hi verghet Gods en̄ der maghe.
 
Dit es een grote plage:
 
Si can verradenesse spreken
1490
En̄ ghemenen orbore breken /
 
Spreken oec metten vianden
 
Om die vriende te werpene in scanden.
 
Manslacht / keefdoem / en̄ overspel /
 
En̄ alle arch also wel /
1495
Can ommate ghierechede
 
Toe bringhen / hets haer sede.
 
So wien nature heeft ghegheven
 
Een ommate ghierech leven
 
Heeft enen viant al te groet.
1500
So wie dien verwint ter noet /
 
Verwint enen starken viant
 
Also ons Seneca doet becant;
 
En̄ so hi inden sin meer oudt
 
So hi meer wast en̄ menechfoudt.
1505
Een wijs meester spreect aldus
 
Die men heet Alphontius:
 
Nemmermeer en waer ghenoechlijcheyt
 
Daer en ware voere onghenoechlijcheyt.
 
Men droncke met genoechten nemmermeer/
1510
Daer en hadde dorst gheweest eer;
 
Noch en ate / also men leest /
 
Daer en hadde hongher gheweest.
 
Der en worde men niet gheware
 
Welc ghemac of raste ware /
1515
En̄ waer na eneghen arbeyt.
 
Aldus van allen gheseyt
 
Daer slijfs ghenoechte in leghet
 
Als dit voer overwaer gheseghet /
 
Es maniere der ghierecheyt /
1520
Die in latine / gheloeft mi das /
 
Gheheten es voluptas /
 
Dats een wille ongheordineert
 
Die in allen genoechten svleeschs verkeert /
 
En̄ oec gheen inde en heeft
1525
Die wile dat die mensche leeft.
 
Also ons Seneca seghet
 
Als hi in sijn sterven leghet
 
En̄ hem verbijt die felle doet /
 
Dan en behoudt hi cleyne no groet.
1530
So es sijn gout en̄ arbeyt al
 
Verloren / groet en̄ smal.
 
Seneca doet ons bekint /
 
Die sine ghierecheyt verwint
 
Es starker / des sijt vroet /
1535
Dan die sinen viant onder doet.
 
Die altoes in die ghierechede
 
Waect en̄ heeft ghenen vrede.
 
En̄ waer dat vrede niet en es
 
Daer en es God niet / sijts gewes.

Vorige Volgende