Wês foarsichtich, Watse

Untstean

Smit hat it boek yn minder as fjirtjin dagen skreaun, yn syn fyn mar dúdlik lêsber hânskrift. As papier brûkte er de efterkanten fan vara-radioprogramma's. It ferhaal moat him maklik út 'e pinne kommen wêze, trochhellingen en ferbetteringen sitte der amper yn. Wol hat er in inkelde kear op in los blêd in taheakke makke. Net relevant, mar wol nijsgjirrich is dat der yn stee fan Twellegea ear st Offenwier stie.

De haadstikken begjinne, útsein it fjirde dat de tiisdeis beskriuwt, allegearre op in nij blêd. De ûnderferdeling fan 'e haadstikken bestiet ynearsten net of amper. Yn it earste haadstik begjinne de parten ornaris op in nij blêd, mar it foargeande wie fol, dat dat kin ek tafal wêze. Yn it fjirde haadstik is ienris in wytrigel holden, dêr't no III stiet. Yn haadstik fiif is twaris in wytrigel holden, no II en VII. Earst yn it lêste haadstik ferskynt de yndeling en betiteling sa't dy letter yn it boek foarkomt. It haadstik hat as titel ‘Tongersdei’ en de tekst is yn trije blokken ferparte mei de romeinske sifers derboppe.

In oare hân hat de yndeling fan 'e lêste haadstikken oanbrocht/ferbettere. Yn haadstik fjouwer is in streek lutsen dêr't no V stiet. Yn haadstik seis binne streken lutsen dêr't no IV en V steane. Yn it lêste haadstik is in III taheakke en it oarspronklike

[p. 138]

III is feroare yn IV. In kear of fjouwer is yn 'e marzje neist de streek ‘Ruimte’ skreaun. Wêrom't dy korrektor net by it begjin fan it manuskript begûn is mei de ûnderferdeling oan te bringen, is ûndúdlik.

It typoskript is heel wat yn feroare, mar eigentlik allinnich op syntaktysk-stylistysk mêd. Nijsgjirrich is dat hjir ek topografyske oantsjuttingen wizige binne. As Watse op tiisdei efterfolge wurdt, wurde yn it manuskript nammen neamd as de Blauwe Tint en de Trije Romers. Dy besteande nammen binne no ferfongen troch fantasynammen.

Yn it typoskript binne de haadstiktitels letter taheakke, mei de hân skreaun op efterkanten fan vara-tillevyzjepapieren. Dat by it oertikjen stienen de haadstiktitels noch net ienris fêst, soe men ornearje.

De ûnderferdeling is meastepart sa't dy no yn it boek is. De parten begjinne op in nij blêd of, twakear mar, nei in wytrigel. De romeinske sifers binne net typt, mar mei de hân oanbrocht. It hat derfan dat soks op it alderlêste momint bard is. Der binne ek sifers set op plakken dêr't by it typen gjin rûmte holden wie, te witten sneon II en V, snein II en III, moandei II en III, tiisdei II en IV.

Op in stikmannich plakken haw ik de boektekst ferlike mei it typoskript. Der binne my gjin wizigingen opfallen.