Een nieuw sangh-boeck, iuhoudende eenighe psalmen
(1650)–J. Sent–
Auteursrechtvrij
[pagina 3]
| |
2. Hebt acht op mijn suchten ghestadich,
Mijn God end' Coninck groot geacht,
Dewijl ick tot u met aendacht,
Mijn smeecken doe, O Heere ghenadich,
Ende weldadich.
3. Des morghens vroech voor den dagh-rade,
Sult ghy my verhooren eenpaer:
Want seer vroech sal ick u voorwaer
Bidden, wachtende vroech end' spade,
Op u ghenade.
4. Ghy zijt een Godt die de boosheden,
Niet en bemint, maer wederstaet:
By ons zijn de boosdaeders quaet,
Met haren doen end' boose zeden,
Gantsch niet gheleden.
5. Die dwasen die nae u niet vragen
Sullen voor u verschijnen niet:
Want ghy die hatet soo men siet,
Die boosheyt doen, sonder vertsaghen,
Jae met behaghen.
| |
[pagina 4]
| |
6. Ghy sult uwen gramschap bewijsen,
Over die Leughenaers ghemeen:
Doodtslaghers, bedrieghers met een
Sijn voor Godt (dien elck Mensch moet pijsen
Een groot afgrijsen.
7. Maer door u goetheyt hooch ghepresen,
Die ghy my bewijst sal ick gaen,
Om u, O Heer te roepen aen,
In u huys, daer ick sal midts desen
Godt-vruchtich wesen.
8. Gheleyt my, Heer, ende laet doch blijcken,
Aen my u goetheyt, dat my niet
Mijn haters brenghen int verdriet:
Leydt my uwen padt desghelijcken,
Sonder afwijcken.
9. Daer is gheen waerheydt in haer monden
Haer hert is valsch archlistich straf,
Haer keel is als een open graf
Haer tonghe is vol smeeckens bevonden,
Tot allen stonden.
10. Verderftse ende doet te niet haer namen
| |
[pagina 5]
| |
Breeckt haer raet-slagen ende haer doen
Verstroytse om haer boosheyt seer coen:
Want, Heer sy soecken alle t'samen
V te beschamen.
11. Maer verheucht hen 't ghemoet ende sinnen
Die op u vertrouwen altijt,
Datse in u, Heer werden verblijt,
Die uwen naem in herte binnen,
Troulijck beminnen.
12. Want ghy zijt mildet ende overvloedich
Den vromen man, Heer goedertier,
Met uwe gunst deckt ghy hem schier,
Als met den schilt, ghy zijt soo goedich,
Ende seer lanckmoedich.
|
|