Basiorum Liber

[p. 13]

Basivm VII

Centum basia centies,
Centum basia millies.
Mille basia millies,
Et tot millia millies,
Quot guttae Siculo mari,

Quot sunt sidera coelo,

Istis purpureis genis,
Istis turgidulis labris,
Ocellisque loquaculis,
Ferrem continuo impetu,

O formosa Neaera:

Sed dum totus inhaereo
Conchatim roseis genis,
Conchatim rutilis labris,
Ocellisque loquaculis,
Non datur tua cernere
Labra, non roseas genas,
Ocellosque loquaculos,

Molleis nec mihi risus:

Qui, velut nigra discutit
Caelo nubila Cynthius.
Pacatumque per aethera
Gemmatis in equis micat,

Flavo lucidus orbe,

Sic nutu eminus aureo
Et meis lachrymas genis,

[p. 14]

 

Et curas animo meo,

 

Et suspiria pellunt.

 

Heu, quae sunt oculis meis

 

Nata praelia cum labris?

 

Ergo ego mihi vel Iovem

 

Rivalem potero pati?

 

Rivales oculi mei

 

Non ferunt mea labra.