Basiorum Liber

[p. 11]

Basivm V

Dum me mollibus hinc & hinc lacertis
Astrictum premis, imminensque toto
Collo, pectore lubricoque vultu,
Dependes humeris, Neteaera, nostris:
Componensque meis labella labris,
Et morsu petis, & gemis remorsa,
Et linguam tremulam hinc & inde vibras,
Et linguam querulam hinc & inde fugis,
Aspirans animae suavis auram,
Mollem, dulcisonum, humidam, meaeque
Altricem miserae, Neaera, vitae:
Hauriens animam meam caducam,
Flagrantem, nimio vapore coctam,
Coctam pectoris impotentis aestu,
Eludisque meas, Neaera, flammas,
Flabro pectoris haurientis aestum
O, iucunda mei caloris aura:
Tunc dico, deus est Amor deorum,
Et nullus deus est Amore maior
Si quisquam tamen est Amore maior,
Tu tu sola mihi es Neaera maior.