[Apocalypsis Iohannis]
Hijr beginnet dat prologus van Apocalipsis.
Dit boec Apocalipsis is onder die ander boke des nyen testaments een prophecie gheheten ende alsoe als dat ewangelium boven gaet der settinghe der ewe, a[l]soe gaet dese boven die oelde prophecien, die de dinghe van verre saghen toe comende. Ende dese prophecie bewiset vele dinghe die van Cristo ende van der hilgher kerken ghesciet sijn ende oec die noch gheschien sullen in veel persecucien ende vervolghinghe die op dese theghenwordighe kerken vallen sal in Antikersts tiden ende oec daer te vore, alsoe als hi bewiset in menigherhande ghelikenissen om allen menschen te troesten ende te bereyden die crone te ontfanghen, die van elker vervolghinghe antwort, die men voer die name ons Heren Ihesu Cristi lidet, ende daer omme waerden wy sonderlinghe totten liden vermaent. Want alsoe alst ghelove alre dogheden fundament is, alsoe werden alle dogheden ghevoedet in den liden ende wassen daer in op in der hoechster volcomenheyt. Die gheleert sijn, sullen dit boec lesen ende verstaen, die ongheleerde sullent horen, ende alle menschen sullent doen.
Die sake, waer om dattet sunte Johan schreef, was dese: doe hi van den keyser Domitiano in ellende ghesent was, stonder veel ongheloven ende vervolghinghen op in die kerken daer hi in ghepredict hadde. Om dat toe verhoden ende wederstaen waert hy van den enghel Gods daer toe vermaent ende ghetroestet, want hi sonder alre menschen troest in ellenden was. Hy bescrivet der hilgher kerken staet somtijt nae dien dat hi gheweest heeft, somtijt nae dien dat hi nu is, ende somtijt na dien dat hi noch wesen sal.
Dit prologus gaet uyt ende Apocalipsis beghinnet.
Auteursrechtelijk beschermd