Nieuwe testament (Noordnederlandse vertaling)

I

O Theophile, mijn ijrste sermoen heb ic ghescreven van allen dien dinghen die Ihesus [begonste] te doen ende te leren tot dien daghe toe, dat hy op voer te hemel, gebiedende den apostelen, die hy overmids den Hilghen Gheest vercoren hadde, den welken apostelen hy hem selven levende vertoende na sijnre passien in vele bewisinghen, ende hy [openbaerde] hem viertich daghe lanch ende sprach hem van den rike Gods. Ende mit hem te gader etende gheboet hy, dat sy van Iherusalem niet en souden scheyden, mer des vaders beloefte verbeyden, die ghy ghehoert hebt, seyde hy, doer mynen mont: want Johannes hevet inden water ghedopet, mer ghy suelt inden Hilghen Gheest ghedopet warden na niet vele deser daghe. Daer om vragheden sy hem, die daer versament waren, ende seyden: Here, salstu in deser tijt dat rijch van Israel weder setten? Hy seyde hem: Het en hoert ju niet toe die tiede ende die ure te weten, die die vader in sijnre moghentheyt gheset heeft, mer ghy selt ontfanghen die crachte des Hilghen Gheests, die van boven comende is in ju ende ghy selt my ghetughe wesen in Iherusalem ende in al Judeen ende Samarien ende al tot den eynde der eerden. Ende doe hy dit gheseyt hadde, wart hy op gheheven, daer sijt aen saghen, ende [een] wolken onfenghen van haren oghen. Ende doe sy hem saghen in den hemel gaen, siet, doe stonden daer by hem twe manne in witten clederen, die oech seyden: Ghy Galileeusche manne, wat stae ghij

[fol. 137v]

in den hemel seende? Dese Ihesus, die van ju op ghenomen is in den hemel, die sal alsoe comen als ghine in den hemel [hebt] sien gaende.

Doe keerden sy weder te Iherusalem van den berch van Oliveten, die by Iherusalem is alsoe veel weghes als op enen sabaoth geoerloft was te gaen. Ende doe sy inghinghen in die eet camer, clommen sy op, daer si bleven: Peter ende Johannes, Jacobus ende Andreas, Philippus ende Thomas, Bartholomeus ende Matheus, Jacobus Alphei ende Simon Selotes ende Judas Jacobi.

Alle dese waren eendrachtelich volherdende in der bedinghen mitten wiven ende Maria Ihesus moder mit haren bruderen.

In dien daghen stont Petrus op in die middel der bruedere ende seyde - die schaer der mynschen was bina hondert ende twintich - : Ghy brueders, ghy manne, die scrifture moet vervullet wesen, die die Hilghe Gheest voer gesproken heeft doer Davids mont van Judas de der gheenre leyder was, die Ihesum vinghen, die onder ons mede ghetellet was ende in der delinghe ontfanghen hadde dat lot des dienstes. Ende dese besat den acker, die ghecocht was mit den lone der quaetheyt ende hy waert ghehanghen ende hy barstede te middewarts ende alle sijn inghedoemte sijn uyt ghestort, ende dit is alle den ghenen die te Iherusalem wonen, kundich geworden, alsoe dat die acker in haerre tonghen gheheyten is Acheldemach, dat is des bloets acker. Want het is in dat boech der psalmen ghescreven: Sine woninghe sal woest werden ende nieman en si, die daer in wone, ende: Sijn bisschedoem ontfanghet een ander.

Daer om behoerter een van desen mannen, die in elker steden met ons vergadert sijn, daer die Here Ihesus in ende uyt ghegaen heeft onder ons, beginnende van sunte Johannes doepsel tot dien daghe dat hy van ons op ghenomen waert, mit ons een ghetughe te werden sijnre verrisenisse.

Ende si setter twe: Joseph, die gheheyten is Barrabas, die oech toeghenamet is die gherechtighe, ende Mathiam. Ende al biddende spraken sy: Du Here, die alre menschen herte kenste, vertoech ons welc du vercoren hebste een van desen tween, die stat der dieninghe ende der apostelscap te ontfanghen, van welker stede Judas of gevallen is, op dat hy in sijnre stede ghinghe. Ende sy gaven hem lote ende op Mathiam viel dat lot ende hy is toe ghetellet mit den elven apostelen.