Actus apostolorum
[Proloog]
Hijr beghint een prologus in der Apostel werc dat sunte Lucas bescrijft:
Lucas die ewangeliste was ijrst een meyster in medicinen tot Anthiochien ende daer na waert hy een jongher der apostelen Cristi ende daer na wart hij sunte Pauwels discipel ende starf in maghedeliker reynicheyt, doe hy vier ende tachtich jaer oelt was. Dese bescreef der apostelen werke na dat hy dat ewangelium bescreven hadde, also als hij van den apostel Paulo ende van den anderen apostelen gehoret hadde ende geleert was. Het schijnt een slechte historie te wesen, mer alle die woerde die sie recht in siet, sijn elker quellender sielen een medicine overmids der kintsheyt ende des opwassens der gheborenre kerke. Niet dat alle die werke der apostelen hijr yet in bescreven sijn, want dat en waer niet lichte te doen, mer also veel dattet ghenoech is ter stichtinghe des gheloefs den ghenen diet lesen ende diet horen. Ende al wasser voel die vander apostel werke gescreven hadden, alsoe als sunte Lucas screef, wast gheapprobiert ende ontfanghen van den apostelen ons Heren Ihesu Cristi, doe sy nochtan leveden in der tijt.
Hij beginnet ijrst van Judas, die verrader was ende een soen des verlies, ende hy eyndetet van sunte Pauwels vanghenisse, hoe hy ghespannen ghesendet was te Romen totten keyser. Ende dit doet hij daer om, want sunte Pauwels langhe tijt een persequiere der hilgher kerken gheweest hadde, ende hy namaels een getrouwe leraer ende apostel, voldurende al tot den eynde toe. In den yrsten beginnet hy aldus:
Auteursrechtelijk beschermd