Nieuwe testament (Noordnederlandse vertaling)

XVIII

Doe Ihesus dit gheseghet had, ghinc hi mit sinen jongheren uut over dat rivierken Cedron, daer een hof was, daer hi in ghinc ende sijn jongheren. Ende Judas, die hem verraden had, wiste die stede, dat Ihesus mit sinen jongheren dicwil daer te gader quam. Doe Judas een vergaderinghe van gheseelscap ghenomen hadde ende die dienres vanden bisscoppen ende vanden Pharizeen, quam hi daer mit lanternen ende mit vackelen ende mit wapene. Ihesus wistet al dat op hem toecomende was, ende trat voert ende seyde hem: Wien soecti? Si antworden hem: Ihesum Nazarenum. Ihesus seyde hem: Ic bint. Ende Judas, die hem verriet, die stont oec mit hem luden. Daer um, doe hi hem seyde: Ic bint, ghinghen si achterwert ende vielen op die aerde. Doe vraghede hi hem anderwerve: Wien soecti? Si seyden: Ihesum Nazarenum. Ihesus antworde: Ic hebt u gheseghet, dat ict bin. Ist dat ghi mi zoect, soe laet dese en wech gaen, op dat vervullet worde dat woert, dat hi sprac: Die du mi ghegheven hebste, van hem en heb ic nyement verloren. Doe had Symon Petrus een zwert. Dat toech hi uut ende sloech des bisscops knecht ende hieu hem sijn rechter oer af, ende des knechs name was Malchus. Doe seyde Ihesus tot Peter: Steke dijn zwert in die scede. Den kellic, dien mi die vader ghegheven hevet, en sal ic dien niet drincken?

Dat gheselscap ende die tribune ende der Joden knechte vinghen Ihesum ende bonden hem ende brochten hem tot Annam, want hi was Cayphas zwagher, die bisscop was dies jaers. Het was Cayphas, die den Joden den raet gaf, dattet nut waer enen mensche voer dat volc te sterven.

Symon Petrus volghede Ihesum ende een ander jongher. Mer die jongher was mitten bisscop bekent ende ghinc mit Ihesum in des bisscops hof. Petrus stont totter doeren buten. Doe ghinc die jongher uut, die mitten bisscop bekant was, ende hi seydet der doerwachster ende leyde Petrum in. Doe seyde die derne, die die dore wachte: Ende en bistu oec niet van dies menschen jongheren? Hi seyde: Ic en bins niet. Die knechte ende die dienres stonden biden colen, want het was colt, ende wermden hem. Petrus was hem oec wermende ende staende mit hem luden.

Doe vraghede die bisscop Ihesum van zinen jongheren ende van sijnre leringhe. Ihesus antworde: Ic sprac der werlt apenbaerlic; ic heb altoes gheleert in synagoghen ende inden tempel, daer die Joden vergaderden, ende ic en heb niet in dat heymelic gheseghet. Wat vraghestu mi? Vraghet hem, diet hoerden, wat ic hem gheseghet heb: sich, dese wetent, wat ic hem gheseget heb. Doe hi dit gheseghet hadde, een vanden dienres, die daer bi stont, gaf Ihesum enen kinnenbachs slach ende sprac: Saltu alsoe den bisscop antworden? Ihesus antworde hem: Heb ic qualic gheseghet, ghef ghetuuch van quade, mer heb ic wal gheseghet, waer um slaestu mi? Ende Annas seynden ghebonden tot Caypham den bisscop.

Symon Petrus was staende ende wermede hem. Doe seyden si hem: Ende en bistu oec niet van sinen jongheren?

[fol. 63v]

Hi lochendes ende seyde: Ic en bin niet. Doe seyde een vandes bisscops knechten, sijn neve wees oer Petrus af sloech: Ende en sach ic di niet mit hem inden hove? Anderwerf noch versaectens Petrus. Ende rechtevoert crayde die hane.

Doe brachten si Ihesum tot Caypham in die vier scare, ende het was vroe. Ende si enginghen in die vierscare niet, dat si niet bevlect en worden, mer dat si den Paeschen sou den eten. Doe ghinc Pylatus tot hem uut ende seyde: Wat wroeghinghen brenghi teghen desen mensche? Si antworden ende seyden hem: En hadde hi gheen quadie gheweest, wij en hadden hem di niet overghelevert! Doe seyde hem Pylatus: Soe nemet ghien ende oerdelt hem nae uwer ewe. Doe seyden hem die Joden: Het en is ons niet gheoerloeft yeman te doden, op dat Ihesus woert vervult werde, dat hi seyde, beteykenende, van wat dode hi sterven soude.

Doe ghinc Pylatus weder in die vierscare ende riep Ihesum ende seyde hem: Bistu der Joden coninc? Ende Ihesus antworde: Segghestu dat uut die zelven of hebbent ander lude van mi gheseghet? Pylatus antworde: Ende bin ic een Jode? Dijn volc ende dijn bisscoppen hebben mi di overghelevert, wat hebstu ghedaen? Ihesus antworde: Mijn rijc en is van deser werlt niet. Had mijn rijke van deser werlt gheweest, mijn dienres souden ummer bestreden hebben, dat ic den Joden niet over ghelevert en worde, mer nu en is mijn rijc niet van hier. Doe seyde hem Pylatus: Bistu dan een coninc? Ihesus antworde: Du segstet, want ic bin een coninc. In dien bin ic gheboren ende daer toe bin ic in die werlt ghecomen, dat ic der waerheyt een ghetuuch sal gheven. Soe wie vander waerheyt is, die hoert mijn stemme. Doe seyde hem Pylatus: Wat is die waerheyt? Ende doe hi dat gheseghet had, ghinc hi weder uut totten Joden ende seyde hem: Ic en vinde in hem gheen zake. Het is u ghewoente, dat icker u des Paeschens een quijt laet. Daer um, wildi, ic laet u den coninc der Joden? Doe riepen si noch alle ende seyden: Desen niet, mer Barrabam. Ende Barrabas was een moerdenaer.