XVII
Dit seyde Ihesus ende hi sloech sijn oghen op inden hemel ende seyde: Vader, die ure is ghecomen, verclaer dinen zone, op dat di dijn zone verclaer, alsoe als du hem ghegheven hebste moghentheyt alles vleysches, op dat hi hem allen ewich leven gheve, die du hem ghegheven hebste. Dit is ewich leven, dat si di kennen, alleen warachtich God, ende Ihesum Cristum, dien du gheseynt hebste. Ic heb di verclaert opter eerden; dat werc, dat du mi gaveste te doen, heb ic volbracht. Ende du, vader, verclaer mi nu mit dier claerheyt, die ic hadde al eer die werlt was, bi di.
Ic heb dinen name den menschen gheapenbaert, die du mi gaveste vander werlt. Si waren dijn ende du gaveste se mi ende si hebben dijn leringhe gheholden. Nu hebben si bekent, dat alle dinghe die du mi ghegheven hebste, van di zijn, want die woerde, die du mi gaveste, heb ic hem ghegheven ende si hebben se ontfanghen ende waerlic ghekeent dat ic van di uutghinc, ende gheloveden, dattu mi ghesent hebste. Ic bidde voer hem, ic en bidde niet voer die werlt, mer voer die ghene die du mi ghegheven hebste, want si dijn sijn ende allet dat mijn is dijn ende dat dijn is mijn ende ic bin verclaert in hem. Ende nu thant en bin ic in die werlt niet, ende dese sijn in die werlt ende ic come tot di. Heylich vader, beholt se in dinen name, die du mi ghegheven hebste, op dat si een sijn alsoe als wij. Doe ic mit hem was, behielt ic se in dinen name; ic behoedense die du mi ghegheven haddeste ende nyement van dien en wert verloren dan die zone der verdoemenissen, dat die scrifture vervult worde. Mer nu come ic tot di ende dit spreke ic in die werlt, op dat si mijn vroude in hem zelven vervult hebben. Ic gaf hem mijn leringhe ende die werlt hatese, want si vander werlt niet en sijn, alsoe als ic oec vander werlt niet en bin. Ic en bidde niet, dat duse vander werlt nemste, mer dat duse van quade behoedeste. Si en sijn vander werlt niet, alsoe ic oec vander werlt niet en bin. Heylichse inder waerheyt, dijn woert is die waerheyt. Alsoe du mi in die werlt gheseynt hebste, ende ic hebse in die werlt gheseynt. Ende um hem heylighe ic mi zelven, op dat si oec inder waerheyt gheheylicht sijn.
Ic en bidde niet allene voer dese, mer voer die ghene die overmids horen woerden gheloven sollen in mi, op dat si alle een sijn, alsoe du oec, vader, in mi ende ic in di, op dat si in ons een sijn, dat die werlt ghelove, want du mi gheseynt hebste. Ende die claerheyt die du mi gaveste, heb ic hem ghegheven, dat si een sijn als wij oec een sijn, ic in hem ende du in mi, op dat si volbrocht werden in een ende die werlt kenne, dattu mi gheseynt hebste, ende du hebste se ghemint als du mi ghemint hebst.
Auteursrechtelijk beschermd