XV
Ic bin die warachtighe wijngaert ende mijn vader is die ackerman. Hi sal afdoen alle tellighe of rancken die in mi gheen vrucht en brenghen, ende alle tellighe die vrucht brenghen, sal hi bereyden, dat si meerre vruchte brenghen. Nu sijt ghi reyne um der leringhe die ic u ghesproken hebbe. Blivet in mi ende ic in u. Alsoe als een tellich van hem zelven gheen vrucht brenghen en mach, het en si dat hi blive aenden wijngaert, alsoe oec noch ghi, ten si dat ghi blivet in mi. Ic bijn die wijnstoc, ghi sijt die tellighe. Die blivet in mi ende ic in hem, dese brenghet vole vruchten, want sonder mi en moechdi niet doen. Ende soe wie in mi niet en blivet, die sal uut gheworpen werden als een tellich ende sal verdorren, ende si sollen ze vergaderen ende werpen se int vuer ende verbornen se. Eest dat ghi in mi sult bliven ende mine woerde in u bliven, soe wat ghi wilt, soldi bidden ende het sal u ghescien. In dien is mijn vader verclaert, dat ghi vole vruchten brenghet ende mijn jongheren werdt.
Alsoe als mi die vader ghemint hevet, alsoe minne ic u. Oec blivet in mijnre minnen. Eest dat ghi mine ghebode holt, soe soldi in mijnre minnen bliven, alsoe als ic oec mijns vaders ghebode gheholden hebbe ende blive in sijnre minnen.
Dit hebic u ghesproken, op dat mijn vroude in u si ende u vroude vervult werde. Dat is mijn ghebot, dat ghi u onderlinghe minnet als ic u ghemint hebbe. Meerre minne en hevet nyement dan dat yement sijn ziel voer sijn vriende seette. Ghi sijt mijn vriende, eest dat ghi doet dat ic u ghebiede. Te hant en salic u niet heyten knechte, want een knecht en weet niet, wat sijn here doet. Ic heb u vriende gheheyten, want ic heb u kont ghemaect al dat ic van minen vader ghehoert heb. Ghi en hebbet mi niet vercoren, mer ic heb u vercoren ende u ghesettet, dat ghi gaet ende vrucht brenghet ende die vrucht u blive. Ende soe wat ghi minen vader bidden solt in minen name, dat sal hi u gheven. Dat ghebiede ic u, dat ghi u onderlinghe minnet.
Ist dat u die werlt haet, weet, dat si mi eer ghehaet hevet dan u. Haddi vander werlt ghewest, die werlt had ghemint dat hoer was, mer want ghi vander werlt niet en sijt, ende ic u uter werlt ghecoren hebbe, daer um haet u die werlt. Ghedencket mijnre leringhen die ic u gheseghet heb: Die knecht en is niet meerre dan sijn heer. Hebben si mi vervolghet, soe sollen si u oec vervolghen; hebben si mine leringhe ghehouden, soe sollen si oec die u holden. Mer alle dit sollen si u doen um minen name, want si en kennen hem niet, die mi gheseynt hevet. Waer ic niet ghecomen ende en had ict hem niet gheseghet, si en haddens gheen sonde, mer nu en hebben si der sonden gheen ontscolt. Die mi haedt, die haedt oec minen vader. Hadde ic die werke niet ghedaen in hem, die niement anders ghedaen en hevet, si en hadden gheen sonde, mer nu hebben sise ghesien ende mi ende minen vader ghehaedt. Mer dat dat woert vervult worde, dat in hoerre ewe ghe\screven
Auteursrechtelijk beschermd