haer: Wijf, waer sijn si, die di wroegheden? Heeft di niement verdoemt? Si seyde: Neent, Heer. [Ihesus seide haer:] Noch ic en sal di niet verdoemen. Ganc ende en wilt niet meer sondighen!
Anderwerf sprac hem Ihesus toe ende seyde: Ic bin der werlt licht; die mi volghet, en wandert niet in duusternisse, mer hi sal dat licht des levens hebben. Doe seyden hem die Pharizeen: Du gheveste tghetuuch van di zelven, dijn ghetuuch en is niet waer. Ihesus antworde ende seyde hem: Ende eest dat ict tghetughe van mi selven gheve, mijn ghetughe is warachtich, want ic weet, wan ic ghecomen bin ende waer ic gae, mer ghi en weet niet, van waer ic comen sal of waer ic sal gaen. Ghi oerdelt nae vleysche, mer ic en oerdel niement. Ende eest dat ic oerdele, mijn oerdel is warachtich, want ic en bin niet allene, mer ic ende die vader, die mi gheseynt heeft. Ende het is in uwer ee ghescreven, dat twier menschen ghetughe warachtich is. Ic bint, diet ghetughe van mi selven gheve, ende die vader, die mi seynde, ghevet ghetuuch van mi. Doe seyden si hem: Waer is dijn vader? Ihesus antworde: Ghi en kennet noch mi noch minen vader. Waert dat ghi mi keenden, ghi sout licht oec minen vader keennen.
Dese woerde sprac Ihesus in gazophilacium, lerende inden tempel, ende niement en greep hem, want sijn ure en was noch niet ghecomen.
Doe seyde hem Ihesus anderwerf: Ic gae, ende ghi soect mi, ende in uwen sunden soldi sterven. Daer ic gae, en moechdi niet comen. Daer um spraken die Joden: Ende en sal hi hem selven niet verslaen, want hi seghet: Daer ic gae, en moechdi niet comen? Ende hi seyde hem: Ghi sijt van beneden, ende ic bin van boven, ghi sijt van deser werlt, ende ic en bin van deser werlt niet. Daer um hebic u gheseyt, dat ghi in uwen sunden sterven solt, want ghelove ghi des niet, dat ict bin, in uwen sunden soldi sterven. Doe seyden si hem: Wie bistu? Ihesus seyde hem: Tbeghin, ende ic spreke mit u. Voel heb ic van u te spreken ende te oerdelen, mer die mi gheseynt hevet, is warachtich ende dat ic van hem ghehoert hebbe, dat spreke ic in die werlt. Ende sien keendens niet, want hi God sinen vader hiet. Daer um seyde hem Ihesus: Wanneer ghi verheffen solt des menschen sone, dan soldi kennen, dat ict bin ende ic van mi selven niet en doe, mer alsoe mi die vader gheleert heeft, dat spreke ic. Ende die mi gheseynt hevet, die is mit mi en[de] hi en laet mi niet alleen, want ic doe altoes dat hem behaghelic is.
Doe hi dit sprac, gheloefder vole in hem. Doe seyde Ihesus totten ghenen die in hem gheloefden: Ist dat ghi blivet in mijnre leringhen, ghi solt waerlic mine jonghere wesen ende ghi solt die waerheyt kennen ende die waerheyt sal u vrien. Si antworden hem: Wij sijn Abrahams gheslechte ende wij en hebben nye yemanne ghedient, hoe seghestu: Ghi sult vri wesen? Ihesus antworde hem: Voerwaer, voerwaer segghe ic u, dat een yeghelic die sonde doet, is een knecht der sonden. Die knecht en blivet inden huse niet inder ewicheyt, die zone blivet inder ewicheyt. Ist dan dat u die zone sal vrien, ghi solt waerlic vri wesen.
Ic weet, dat ghi Abrahams kijnder sijt, mer ghi wilt mi doden, want mijn woert en vanghet in u niet. Dat ic biden vader ghesien hebbe, spreec ic, ende ghi doet dat ghi bi uwen vader ghesien hebt. Si antworden ende seyden: Abraham is onse vader. Ihesus seyde hem: Sijt ghi Abrahams kijnder, soe doet Abrahams werc, mer nu soecti mi te verslaen, enen mensche, die u die waerheyt spreke, die ic van Gode ghehoert hebbe, dat en dede Abraham
Auteursrechtelijk beschermd