Nieuwe testament (Noordnederlandse vertaling)

XXI

Doe sach Ihesus rike lude, die hoer ghiften worpen in die offerkiste. Hi sach een arme wedue twee pennincsken daer in werpen ende hi seyde: Ic segghe u voerwaer, dat dese arme weduwe meer ghebrocht hevet dan si alle, want alle dese hebben Gode goede gaven gheseynt van dat hem overvloyde, mer dese van dien dat hoer ontbrac, hevet si alle hoer voetsel dat si hadde, gheseynt.

Ende den ghenen die seyden vanden tempel, dat hi mit goeden stenen ende mit gaven verciert waer, dien seyde hi: Het sullen daghe comen, in welken dat dese dinghe die ghi siet, die een stene opten anderen niet ghelaten en sal werden, men en sallen destrueren. Doe vragheden si hem ende seyden: Ghebieder, wanneer sal dit wesen ende wat teykene sal daer sijn, als si beghinnen te ghescien? Hi seyde: Siet, dat ghi niet verleyt en wert. Want vole salre comen in minen name ende segghen, dat ict bin ende: Die tijt is ghenaect. Daer um en wilt hem niet nae gaen. Wanneer ghi horen solt stride ende twistinghe, en wilt niet verveert wesen. Dese dinghen moeten irst ghescien, mer niet rechtevoert en eest eynde.

Doe seyde hi hem: Dat volc sal opstaen yeghens dat volc ende rike jeghen rike ende tot sommighen steden solen wesen groet eertbevinghe ende sterften ende hongher ende vresen vanden hemel, ende het sollen grote teykene wesen. Mer voer alle dit sollen si hoer hande aen ju slaen ende sollen u vervolghen ende over leveren in die synagoghen ende trecken ju ghevanghen um minen name tot coninghen ende tot richters. Dit sal u ghescien tot enen ghetughe. Daer um settet in uwen herten niet voer te dencken, hoe ghi antworden solt, want ic sal ju mont ende wijsheyt gheven, wien alle uwe weder zaken niet wederstaen noch wederspreken en sollen moghen. Ghi solt overghelevert werden van ouderen, van bruederen ende van maghen ende vrienden, ende si sollenre ter doet brenghen van ju, ende

[fol. 47v]

solt ghehaedt wesen van allen menschen um minen name, ende een haerken en sal van uwen hoefde niet verloren werden. In uwer verduldicheyt soldi juwe ziele besitten.

Wanneer ghi Iherusalem umbeleghet sollet sien vanden heere, dan weet dat sijn verdervinghe ghenaect is. Dan die in Judeen sijn, die moeten in die berghe vlien ende die int middel sijn, die moeten dalen, ende die in conincriken sijn, die en sollen daer niet uut gaen, want dit sijn daghe der wraken, op dat alle dinghe vervult werden, die ghescreven sijn: Wee dien die kijnder draghen ende voedsteren sijn sullen in dien daghen! Want het sal een groet drucke wesen opter eerden ende verbolghenheyt desen volke, ende si sullen vallen vanden snede des zweerds ende si sollen ghevanghen heen gheleyt werden onder alt volc, ende Iherusalem sal vanden heydene vertreden werden thent die tide der gheslechten vervult werden.

Ende het sollen teyken wesen inder sonnen ender inder manen ende inden sterren, ende inder eerden bedructheyt des volcs van vreeslicheyt des gheluuds vander zee ende der vloeden, ende die menschen sollen verdorren van anxt ende vander verbeydinghen, die alle der werlt over comen sal, want die moghentheyden des hemels sollen beruert werden. Ende dan sollen si des menschen sone sien comen inden wolken mit groter macht ende groetheyden. Alse dese dinghen beghinnen te ghescien; siet toe ende boert op ju hoefde, want u verlosinghe naect.

Ende hi seyde hem een ghelijckenis: Siet den vigheboem ende alle boeme. Ghi weet, wanneer si vrucht brenghen, dat dan die zomer nae bi is. Ende des ghelijcs, wanneer ghi sult sien dat dese dinghen ghescien, dan weet dat dat rike Godes nae bi is. Ic segghe ju voerwaer, dat dit gheslechte niet heen liden en sal, alle dese dinghe en sullen ghescien. Hemel ende eerde sollen overgaen, mer mijn woerde en sollen niet overgaen.

Siets ju toe, dat ju herten niet bezwaert en werden in overtalicheyden ende in dronckenscap ende in sorghen deses levens ende over ju come dan die haestelike onversien dach, want recht als een stricke sal hi comen in hem allen, die sitten op dat aensicht der eerden. Waect dan alle tijt ende biddet, op dat ghi werdich moghet werden alle dese toecomende dinghen te vlien ende te stane voer den sone des menschen.

Des daghes leerde hij inden tempel ende des nachtes ghinc hi uut ende bleef inden berch van Oliveten. Ende alle dat volc quam des morghens vroe inden tempel tot hem um hem te horen.