Ihesus dien ende seyde: Moyses screef u dit ghebot om u verhardicheyt uwes herten. Vanden beghinne der creaturen maecten hise wijf ende manne. Ende seyde: Daer umme sal die mensche vader ende moeder laten ende aenhanghen tot sinen wive, ende si twe sullen wesen in een vleysche, alsoe datter nu niet twe sijn, mer een vleysche. Daer om dat God te gader ghevoeghet hevet, dat en sal die mensche niet scheyden. Ende inden huse vraechden hem sijn jongheren oec vanden selven. Ende hi seyde hem: Soe wie sijn wijf laet ende een ander neemt, die doet overspeel boven hoer, ende laet een wijf horen man ende neemt enen anderen, si doet overspeel.
Doe brochten si hem kijnderken, dat hi se berueren soude, mer die jongheren verbodent den ghenen die se brochten. Doe Ihesus dat sach, nam hijt recht in onwerde ende seyde tot hem: Laet die kijnderken tot mi comen ende en verbiedes hem niet, want alsulker is dat rike der hemelen. Ic segghe u voer waer: Soe wie dat dat rike Gods niet en ontfanct als een kijndeken, hi en sal daer niet ingaen. Ende hi ombevencse ende leghede sijn hant op hem ende benedidese.
Doe hi uutghinc ende inden weghe was, doe liep daer een voer ende knielde voer hem ende bat hem ende seyde: Guede meyster, wat sal ic doen, dat ic dat ewighe leven ontfanghe? Ihesus antworde hem: Waer um heytstu mi guet? Niement en is guet dan een, Got. Du weetste die gheboede? Hi seyde: Weellic? Doe gheen overspeel, en verslach niement, en steel niet, en sprec gheen valsche tuech, en doe gheen boesheyt, eer dinen vader ende dijn moeder. Hi antworde ende seyde hem: Guede meyster, alle dit heb ic van mijnre joghet gheholden. Ihesus sach hem aen ende hi minden hem ende hi seyde hem: Een ontbrecti, ganc ende vercoep alle dinc dattu hebste ende ghevet den armen ende du salt enen scat inden hemel hebben, ende come ende volghe mi nae. Dese wart bedruct in dien woerden ende ghinc al droevich en wech, want hi was voel besitlicheyt hebbende.
Doe sach Ihesus al um ende seyde sinen jongheren: Hoe swaerlic sullen si, die ghelt hebben, in dat rijc Gods gaen. Die jongheren worden versaghet in sinen worden, ende Ihesus antworde hem anderwerf ende seyde: Kijnderken, hoe zwaer eest den ghenen in dat rijcke Gods te gaen, die betruwen inden ghelde hebben. Het is enen cameel lichter te gaen doer eenre naelden oghe dant enen riken is te gaen in dat rijcke Godes. Si verwonderden hem voel te meer ende seyden tot hem selven: Ende wie mach dan behouden bliven? Ihesus sach se aen ende seyde hem: Den menschen eest onmoghelic, mer Gode niet, want alle dinc is bi Gode moghelic.
Doe began hem Petrus toe segghen: Sich, wij hebben alle dinc ghelaten ende sijn di ghevolghet, wat sal ons daer um werden? Ihesus antworde ende seyde: Ic segghe u voerwaer, niement en is, die huus laet of brueders of susteren of moeder of vader of wijf of kijnder of acker om mi ende om die ewangelie, hien sal weder ontfaen hondertwerf alsoe voel nu in deser tijt in husen, in bruederen, in susteren ende moederen ende kijnderen ende ackeren, mit vervolghinghen, ende inder toecomender werlt dat ewighe leven. Vole der ierster solen wesen die leeste ende die leeste die irste.
Si waren opclimmende inden weghe tot Iherusalem, ende Ihesus ghinc voer hem ende si verwonderden hem ende die den volchden, die vreesden. Ende anderwerf nam Ihesus die twalef tot hem ende began hem te segghen dat toecomende waer. Want siet, wij climmen op tot Iherusalem ende des menschen soen sal overghelevert werden den princen der priesteren ende den scriben ende den olsten ende si sullenen verduemen totter doet ende sullenen overgheven den heydenen, ende si sollen hem bespotten ende bespien ende gheselen ende verslaen, ende des dorden daghes sal hi verrisen.
Doe quamen tot hem Jacobus ende Johannes Zebedeus kijnder ende seyden: Meyster, wij willen dat ghi ons doet soe wat wij bidden. Ende hi seyde hem: Wat wildi dat ic ju doe? Ende si seyden: Ghif ons, dat onser een toe diner rechterhant sit ende die ander toe diner luchterhant in dijnre glorien. Ihesus antworde hem: Ghi en weet
Auteursrechtelijk beschermd