VII
Ende doe vergaderden tot hem die Pharizeen ende sommich vanden scriben, die van Iherusalem quamen. Ende doe si sommich van sinen jongheren saghen dat broet eten mit onghedwoghenen handen, lasterden si se. Die Pharizeen ende alle die Joden en eten niet, si en wasschen ierst stadeliken haer hande ende houden die settinghe der olders, ende als si vander merct comen, en eten si niet, eer si ghedwoghen sijn, ende voel ander dinghen die hem gheseet sijn te holden, die wasschinghe der kelliken, der watervate, der potten ende der bedden. Die Pharizeen ende die scriben vragheden hem: Waerom en wanderen dijn jongheren niet nae der ouder settinghe, mer mit onghedwoghenen handen eten si dat broet? Hi antworde hem ende seyde: Ysayas heeft wel van u ypocriten, ghepropheteert, als ghescreven is: Dit volc eert mi mitten lippen, mer hoer herte is verre van mi. Te vergheves oefenen si mi, ende leren die leringhe ende die ghebode der menschen ende laten after dat ghebot Gods. Ghi holt der menschen settinghe: die wasschinge der vate ende der kelliken, ende doet vole ander dinghen, desen ghelijc. Ende hi seyde hem: Op dat ghi u settinghe holt, soe brecti dat ghebot Gods. Want Moyses seyde: Eer dinen vader ende dijn moeder, ende: Soe wie sijn vader of sijn moeder vermalediet of qualiken sprect, die sal den doot sterven. Ende ghi segghet: Soe wie sijn vader of sijnre moeder toe seyt Corban, dats soe wat gaven dat van mi ghegheven wort, coemt di te baten ende voert aen en laet ghien sinen vader of sijnre moeder niet meer gueds doen, ende vercort dat wort Gods om u settinghe, die ghi ghegheven hebt, ende voel des ghelikes doet ghi.
Ende anderwerf riep hi die scare tot hem ende seyde: Hoert mi alle ende verstaet: Niet en is buten den menschen, alst inden menschen gaet, dat hem bevlecken mach, mer die dinghe die uten menschen gaen, die bevlecken den menschen. Soe wie oren heeft te horen, die hoer.
Ende doe hi vander scaren ghinc in een huus, vragheden hem sine jongheren um die parabolen, ende hi seyde hem: Sijt ghi oec aldus onverstandel? En verstadi niet, want al dat van buten ingaet inden mensche, dat en mach hem niet besmetten, want het en gaet in sijn herte niet, mer het gaet inden buuc ende nederwerts gaet dat uut ende purgiert alle die spise. Hi seyde hem: Dat vanden menschen uut gaet, dat besmet den mensche. Van binnen uut den herte des menschen comen quade ghedachten voert, overspil, oncuuscheyt, manslachte, diefte, ghiricheyt, quaetheyt, boesheyt, onscamelheyt, een quaet oghe, blasphemie, hoverdie, dwaesheyt. Alle dese quade comen van binnen uut ende besmetten den mensche.
Ende van danne stont hi op ende ghinc inden lande van Tiri ende Sydonis. Hi ghinc in een huus ende woude dattet niement gheweten en hadde, ende het en mocht niet verholen bliven. Een wijf, wees dochter enen onreynen gheest hadde, rechtevoert doe si van hem hoerde, ghinc si in ende viel tot sinen voeten. Het was een heydens wijf vanden gheslechte Syrophenissa. Ende si bat hem, dat hi den viant uutworpe van hoerre dochter. Hi seyde hoer: Laet die kijnder ierst versaden. Het en is niet guet, der kijnder broet te nemene ende den honden te werpen. Ende si antworde ende seyde hem: Heer, dat is waer, mer die welpkine eten onder die tafel vander kijnder crumen. Ende hi seyde hoer: Om dier woerde ganc, die viant is uutghegaen van dijnre dochter. Ende doe si heen in hoer huus ghinc, vant si die maghet opten bedde ligghen ende den viant uutghegaen.
Auteursrechtelijk beschermd