III
Anderwerf ghinc hi in die sinagoghe ende daer was een mensche die een verdorde hant hadde, ende si wachten hem, of hi des saterdaghes yet ghesont maecte, op dat siene wroeghen mochten. Ende hi seyde tot dien mensche die die verdorrede hant hadde: Stant op ende stae in die middel. Ende hi sprac tot dien ghenen die sijns waer namen, oft des saterdaghes gheorloft si wael te doen of qualic, die zielen te behouden of te verliesen? Ende si sweghen. Ende hi omme sachse mit toerne ende wart bedrucket vander blintheyt hoers herten, ende seyde dien mensche toe: Reyke uut dijn hant! Ende hi streckede se uut ende sijn hant was ghesont ghemaect. Doe ghinghen die Phariseen rechtevoert uut ende maecten enen raet mit Herodes knechten ende maecten enen raet jeghens Ihesum, hoe sine mochten verderven.
Ende Ihesus ghinc mit sinen jongheren neder werts totten meer. Ende een grote scare van Galileen ende van Judeen volchden hem, ende van Iherusalem ende van Ydumea ende van over der Jordanen ende die van omtrent Tirum ende Sydonem een grote menichte quam tot hem, doe si hoerden wat hi wrochte. Doe seyde hi sinen jongheren, dat si hem een scepkijn verworven om der scaren wille, dat si hem niet en verdructen. Hi maecter veel ghesont, dat si oec vallende op hem quamen, op dat si hem rueren mochten. Alle die ziecheyden hadden ende onreyne gheeste, doe si hem saghen, vielen si hem te voeten, ende riepen ende seyden: Du bist die sone Gods. Ende hi verboettet hem hardelic, dat si hem niet en apenbaerden.
Doe clam hi opten berch ende riep tot hem die hi woude, ende si quamen tot hem. Ende hi maecte datter twaelve was mit hem, die hi seynde te prediken, ende gaf hem macht die siecheyden ghesont te maken ende die viande uut te werpen. Ende gaf Symon den naeme, dat hi Petrus hiete, ende Jacob Zebedeus soen ende Johanne Jacobs brueder ende hietse Bonerghes, dats kijnder des donres, ende Andreas ende Philippum ende Bartholomeum ende Matheum ende Thomam ende Jacob Alpheus sone ende Tadeum ende Symone Cananeum ende Judas Scarioth, die hem verriet.
Si quamen int huus ende die scaren vergaderden anderwerf, alsoe dat si gheen stede en hadden tbroet tetene. Doe dat die sine hoerden, ghinghen si uut um hem te houden ende seyden, dat hi in verwoetheyden ghewandelt was. Ende die scriben, die van Iherusalem ghecomen waren, die seyden: Hi heeft Belsebuc binnen ende inden prince der viande werpt hi die viande uut. Doe riep hi se te gader ende sprac hem in parabolen toe: Hoe mach die Sathanas den Sathanam uut werpen? Ende is een rijc in hem selven ghedeylt, dat rijc en mach niet staen. Ende eest dat een huus op hem selven valt ende ghedeylt [wort, dat huus] en mach niet staen. Ende eest dat Sathanas up stighet in hem selven, hi is ghedeylt ende en mach niet staen, mer hi heeft een eende. Niemant en mach in eens starkers mans huus gaen ende sijn vate ontnemen, hi en bijnde den sterken ierst ende dan sal hi sijn huus beroven. Ic segghe u voerwaer, datten sonen der menschen alle sonde vergheven sullen werden ende die blasphemie, daer si mede blasphemierden, mer soe wie inden Heylighen Gheest blasphemie sprect, die en heeft ghene verlatenisse inder ewicheyt, ende hi sal sculdich wesen der ewigher misdaet. Om dat si seyden: Hi heeft den onreynen gheest.
Doe quamen sijn moeder ende sijn brueders ende bleven buten staende. Si seynden tot hem ende riepen hem. Die scare sat omtrent hem, ende si seyden tot hem: Sich, dijn moeder ende dijn brueders soeken di daer buten. Hi antworde hem ende seyde: Wie is mijn moeder ende mijn brueders? Ende aensachse alle om, die omtrent hem saten, ende seyde: Siet, mijn moeder ende mijn brueders. Soe wie den wille Godes doet, dat is mijn brueder ende
Auteursrechtelijk beschermd