Nieuwe testament (Noordnederlandse vertaling)

VIII

Doe Ihesus nederclam vanden berghe, volgden hem vole scharen, ende sich, een melaets mensche quam ende aenbeden hem ende seyde: Heer, of du wilts, du moghest mi ghesont maken. Ende Ihesus reykede uut sijn hant ende ruerdene ende seyde: Ic wil, wes ghesont. Ende rechtevoert was sine melaetsheyt ghesuvert. Ende Ihesus seyde: Sich, dattu dat nyemant en segheste, mer ganc ende vertoech di den priester ende brenghe die offerhande, die Moyses gheboed, hem in enen ghetughe.

Doe Ihesus in Capharnaum ghinc, quam toe hem Centurio ende bad ende seyde: Heer, mijn kijnt leghet verghichticht inden huus ende wert quale ghequellet. Ende Ihesus seyde hem: Ich sal comen ende maekene ghesont. Ende Centurio antworde hem: Heer, ic en beens niet waerdich, dattu ingaest onder mijn dac, mer sech alleen mitten woerde ende mijn kijnt sal ghesont werden. Want ic been een mensche onder ander lude moghentheyt gheseet, hebbende ridders onder mi, ende ic segghe desen: Ganc, ende hi gaet, ende enen anderen: Coem, ende hi coemt, ende minen knecht: Doe dat, ende hi doet dat. Ihesus hoerdet ende verwonderde hem ende seyde dien, die hem volchden: Ic segghe u voer waer, alsoe groet ghelove en heb ic in Israhel niet ghevonden. Ich segghe u, datter veel van Oesten ende van Weesten sullen comen ende sullen neder sitten eten mit Abraham, Ysaac ende Jacob int rike der hemele; die kijnder des rikes sullen uut gheworpen werden in die uterste duusternise, daer sal wesen weninghe ende

[fol. 7r]

knersinghe van tanden. Ende Ihesus seyde tot Centurio: Ganc, ende alsoe du gheloveste ghescie di. Ende dat kijnt is ghesont in diere uren.

Ende doe Ihesus quam in Peters hues, sach hi sijn swagher ligghende ende den saghe hebbende ende ruerde hoer hant ende die saghe ghinc van oer ende si stont op ende diende hem.

Doet avont was, brochten sier hem vele voer, die beseten waren, ende hi warp die gheeste uut inden worden, ende alle, die ziec waren, maecte hi ghesont, op dat vervullet worde dat Ysayas die prophete sprac: Hi hevet onse crancheyt ghenomen ende onse siecheyde ghedraghen.

Ihesus sach vele scaren um hem ende gheboet overt mer te varen. Doe quam tot hem een scribe ende seyde: Meyster, ic sal di volghen waer du heen gaeste. Ende Ihesus antworde hem: Die vossen hebben hoer hole ende die voghel des hemels hoer neesten, mer die sone des menschen en hevet niet, daer hi sine hoeft op neyghe. Een ander van sinen jongheren seyde hem oec: Heer, laet mi ierst gaen ende graven minen vader. Ihesus antworde hem: Volch mi ende laet die doden hoer doden graven.

Ihesus clam in een scipkijn ende sine jongheren volgheden hem. Ende daer stont een groet storm op inder zee, dat dat schipkijn binae ondert water ghinc, ende hi sliep. Doe quamen toe hem sine jongheren ende weckeden hem ende seyden: Heer, behout ons, wij bederven! Ende hi seyde hem toe: Wat sidi vervaert, cleyn van gheloven? Doe stont hi op ende gheboet den wijnde ende der zee, ende daer wart een groet ghesaetheyt. Ende die lude verwonderden hem ende spraken: Hoedanich is dese, want die wijnde ende die zee sijn hem ghehoersam?

Ende doe hi quam over dat meer int rijc der Gerassenen, quamen hem te ghemoete twe beseten menschen uut den grave comende, die zeer wreet waren, dat nyemen bi dien weghe wanderen en mochte, ende riepen: Sone Gods, wat is des ons of dij? Du bist ghecomen ons eer tijt te quellen.

Niet verre van dan ghinghen te weyden een groet cudde van verken, ende die viande baden hem ende seyden: Werpstu ons uut, soe seynde ons in die verken. Ihesus seyde hem: Gaet henen! Ende si ghinghen uyt ende ghinghen hin in die verken, ende alle dat cudde ghinc mit eenre haest in dat meer ende verdronken int water. Die heerden vloen ende quamen in die stat ende boetscapten dit al van dien, die beseten waren. Ende al die stat ghinc uut, Ihesum toe ghemoete, ende doe sij hem saghen, baden si hem dat hi uut hoeren lande ghinghe.