Emblemata

Epithalamion
In Nuptias Consultissimi viri D. Petri Walenburgii, & lectissimae Virginis Geertrudae Langiae.

QVondam Diva Venus (favete dictis)
Infantem peperit, Dij Deaeque
Omnes conveniunt, & inter illos
Partum Iuppiter ipfe gratulatur,
Arrisit Superis puellus, ast (heu)
Ridendo pupugit Iovem misellum,
Nam febrim trepidis statim per ortus
Latè serpere sensit, intimasque
Caecis ignibus exedi medulas:
Chiron consulitur, tremente Venam
Tentat pollice, sed suo tenore,
Non praeter solitum, refert moveri,
Ridet Iuppiter artis imperitum,
Compellatque Themim, cui Deorum
Datum munere vera praedicare;
Haec sub vestibus asserit Sororis
Medelam dubij latere morbi;
Statim Iuppiter Alite expeditâ
Iunonem petijt, memorque dicti
Quasivit medicamen à Sorore.

[p. 238]

 

Nec sibi modò scivit hanc medelam,

 

Sed seris quoque posteris reclusit,

 

Hinc quandò petulans Puella sese

 

Offert luminibus, suosque nutus

 

In nos ejaculatur; impotentes

 

Toti solvimur, integerque sanguis

 

Fervet turbidus, expetitque jungi,

 

Sciens Virgineo in sinu medelam.

 

Testis Sponse, cui cupitus ardor

 

Iam nunc in geminis quiescet ulnis.

 

O quàm flamma tuos peredit artus,

 

Dum morbi taciti latens origo

 

Sensim serperet altius, suique

 

Per contagia cresceret veneni?

 

Virgo blanda, proterva Virgo quas non

 

Tibi nequitias libidinesque

 

Parabat, digitis & ore blando

 

Dum dulces caneret modos Amorum,

 

Nunc rursus rigidae velut Sabina

 

Omnes sperneret impetus Amoris?

 

Tu tu saucius undecunque, Venis

 

Caecum vulnus alis, fovesque flammam,

 

Et paetos quoties vides ocellos

 

Toties jecur omne devoratur.

 

Tandem longius hoc jugum perosus,

 

Ignem detegis: illa post molestas

 

Perpessas hyemes, gravesque noctes

 

AEquales quoque concipit calores.

 

Foelix, post varios cui labores

 

Contingit placidum subire portum,

 

Foelix sponse, cui datur potiri

 

A quâ tot tulerunt Proci repulsam,

 

Eia nunc age sint procul remotae

 

Purae carnifices serenitatis

 

Curae, femina pessimae senectae.

 

Victor fervide vindicato temet

 

Linguâque, oreque, morsiunculâque,

 

Et pro noctibus, asperisque verbis

[p. 239]

 

AEquales dato basiationes,

 

Minutae faculae, minutiores

 

Dij Coeli, nitidi Iovis Quirites

 

Apparent, vocat Hesperus,Venusque.

 

Vos casti comites thori puellae

 

Sponsae figite basium supremum,

 

Cras matri similis suae redibit.

 

Ite nobile par, ralete multum,

 

Et brevi datè filios tenellos,

 

Qui vobis lepidis suis loquelis

 

Levent taedia proximae senectae.