Die prosa van die tweede Afrikaanse beweging

§ 10. A.J. van Zyl.

Gedurende sy verblyf in Natal, waar hy op die rèdaksie van Die Afrikaner was, het Van Zyl 'n studie gemaak van die oorleweringe en gewoontes van die Zoeloes. Die resultaat was 'n klein bundeltjie sketse: Soeloelegendes en -gewoontes (1924) waarin hy op aangename wyse ons inlei in die gedagtekring van hierdie interessante volk en ook 'n paar van hul legendes oor-

[p. 459]

vertel. Noudat daar op ons universiteite meer aandag gewy word aan die inboorlingrasse is dit te hope dat ook ander skrywers sal help om hierdie ryke terrein te ontgin. Natal is nog maar skraal verteenwoordig in ons letterkunde en ek kan my nouliks 'n aantrekliker onderwerp voorstel vir die Natalse skrywer, wat tussen die Zoeloes groot word en hul taal met gemak praat.

Van Zyl het ook 'n aantal kortverhale geskryf vir Die Huisgenoot en Die Volksblad, waarin hy o.a. met sukses komiese situasies tussen hom en sy vrou, Alie, uitwerk.