De koel i Lutterendal

(1947)–Frans Schleiden– rechtenstatus


Tweide bedrief (sjpelt in der kaffieë van 't Sjtienebebke). De kirkmeesters, der hèër lieërer en op zij alleen Mephisto, 't Sjtienebebke (Het Sint Martinusbeeld op tafel).
1e Scène. Hannes ...... Oho... en is dat der breef an der bussjep. Ins zieë of e dat good gesjrève had uvver de koel, en uvver de jonge en de medjere, die nit kinne trowwe... mesjie sjteet e vol va bedanke en nog ins bedanke. Laot mich der brul ins opzitte... En wool e dè breef wurkelich voetsjikke? Sjt.-Bebke Jowaal en e how 'm al an 't Berbke gegève vur no de pos te bringe en 't Berbke had 'm gelèze en ocherm 't koam 'm kriesjentère hei bringe en zaat: ‘Dè breef, dè maog nit eweg.’ Hannes Dat kriesje hei 't kunne laote. Groonesjild 't Berbke... ja, dat hat eminnigmaol nog mieë versjtand wie pastoeër en kaplaon bei-ei. Lèès 'm ins vuur. Hannes Allo da. Der breef an der Bussjep ‘Hoeëgwurdigste hèër Bussjep... (Oho). Dèr hat an der mesjie gelèze van 't ongeluk, dat uvver Lutterendal zal wèëde kòame. Dò kumt 'n koel. Mesjie kumt ze in 't Mamelizerveld of aggene sjnelle wink of in de Heuverdanne, ich weet 't nit, en dan hoeëgwurdigste hèër Bussjep, zow ich leever nit hei zieë. (dè dò hastet, dè breef, dè geet nit e weg). Zit ezu good en lot mich gòa. Ich bin vitsig jaor i Lutterendal. Kinger Deus, jòa, wat han ich ene minnige gedupt, aagenoame vöär de feierliche, getrowd en bedind... 600 mesjie en mieë han ich er zieë sjterve. Ze sterve hei tège der fiengste. Dèr ezu-
[pagina 17]
gaar, Hoeëgwurdigste hèër, hoft nit fienger te sjterve. In hun lève sjravele ze bis ze nit mieë konne. Ich zaan ummer, dat ze te väöl èëte, dova die ivvige besjlèèg. E besjlaag kumt gans plutslich, wie 't ies op 't water. Me ziet 't nit kòame en 't is dò, wie ne valsje aom dè inge bevingt. Gezond en doeëd. 't Vluugt hei durch gen loeët wie de bokkeriejesj. Wens te 't veuls is 't te sjpieë. Do kunne 100000 döktesj nuuks aa dòa, en ze weete nit, wat 't is. Dat is 't groeët ongeluk va Lutterendal... allenei e besjlaag, gans innige oetgenòme. Gut ze mer nò, vöraa oppene kirkef, dò liet dè oet gen hoes... wie ne blits sjloog 't besjlaag 'm doeëd. (dat waor mie groeëtvadder zilliger... dat sjtumt). Nèven 'm de vrouw van 't Hennehupke, ze hou nog innige daag gelèft. Do nève der Moeënes Frens. Ich han 't gezieë, e loog a gen ling, woeë der binned mieënet, iggen hui. E blaozet nog ins mit zieng vol bakke, wie ich 'm der hilligen òalig goof en wòr voet, aagekleid en al, de kap nog op der kop. Gut ze mer nao, 't Sjtivvelekriske, 't Haneberb, der Sjang oet gene tilvet, 't gek Antüentje. En went ze nog ene daag of innig op 't sjterfbed lieje, ging traon, ginge zuuët. Ze kieke nit mieë truk nò 't erfke en de binnede, dò vilt gee wòad uvver de keu en de pèëd. 't Litste is de biech, der hilligen òalig, 't Fes en de generaalabsolutioen en ‘Adieë vrouw’ en ‘Kinger, noe loestert good nò de mam’ en went 't get lang doeët, da zage ze ‘Laot pastoeër ins kòame, 't wilt nit vuraa.’ Pastoeër, heisjt 't da ‘'t hat wilt nit brèëke, ich bin selève nit krank gewest, dòva kunt dat. Zent mich nog ins duchtig mit wiewater...’, da sjterve ze... Dat mot 'r zieë, hoeëgwurdigste hèër, der aom dè roesjt da wie ne sjtorm bis 't alderlitste. Da brèëke ze nog wie 'n sjoer ouw eek en wèëde ze plutzlich vaal en doeëd en kaod. Tège der Hengste sjterve ze hei i Lutterendal. Mer... went de koele kòame, da kumt hei 'n ander volk... en dat geet nit mieë... ich bin vunf en achsig oet gene brookmond. Dèr hat mesjie zelève nit in de zieël gekèëke van dat volk, ezu wie ich 't gidder Zoddesjdig dòa. Dò is 't wie in 't beuisjke van de Häöverdanne. Dat beuisjke is uvveral toe van de sjwoer dennebeum en me ziet der himmel nit en doch hingt 't vol zon. Dat beuisjke is aafgesjloate en vol vreud. Mieng prèdige klinke
[pagina 18]
en verklinke es went ginge 't huët in dè denne beuisj, en doch... 't is andesj, gans andesj. Ich weet nit, wat 't is. De patere in de missioen begrèëpe dat nit en zaate: Pastoeër, die sjtunt bei de sjoeëste prèdig wie eeke baipäöl en grielaache. Op ander plaatsje lieje ze bei ezun prèdig gebòge bis op 'n èëd. Mè dat is gans andesj, dat is 't ring geweete. Die row, dat hant ze van de eeke en der beuisj. Der beuisj, hoeëgwurdigste hèër, dem mot 'r zieë, went de gewietere kòame geròze va Ieëpen op... Dè pakt de wolke va onde vas en hilt ze aa en riet ze durch-ee. Da bruit 't in de loeët wie va honderd keu en da vleege de wolken i sjtukker op Oken aa of rets aaf uvver de Mechelder danne de dellen i. Da wet 't sjwat en duuster iggen kirk, es went inge de slèèg toe dieën. Ezu zunt och de luuj: ze laache nog went ze sjterve. Nao de missioeën, Hoeëgwurdigste hèër, wie de patere voet waore, han ich 't hun 't zondes a-regel gezaat... mè ze zunt nog good, de luuj va Lutterendal, en de patere begriepe dat nit. Dò wet gezaat, dat die va Lutterendal vlooke! Nee, hoeëgwurdigste hèër, dat zunt ging vleuk. Iggene wingterdaag, went 't erg kaod is, da krake en basjte de bitste eeke. Wè zow noe en dan nit vlooke, hoeëgwurdigste hèër? Mè dat zunt ging vleuk. Ich han zelève ging koel gezieë, mè hei zunt 'r die op 'n koel wirke, 't Dole Tieske, der sjlimste van allenei, dè van 't Fieng oet 't Hoalegetske en twei jonge oet 't Hanebuutje en nog mieë. Die zunt al gans andesj wòade. Die zage, ze vlokete i gen koel, dat de belk d'r va basjte.... Dat zunt ging echte Lutterendaler, ze houwe nit van de binnede en de berg en der beuisj, en hun sjpraok is nit mieë de echte sjpraok van de hopsjederling, Mamelis, Mellesjed en Cotesse. En went de koele koame, da lot mich gòa, went 'r ezu good zut, Hoeëgwurdigste hèër Bussjep. Da kan ich nit mieë blieve! En noe mot ich uch nog sjrieve dat ich der hillige Sint Clodulphus en der hillige Sint Joeëzep zal laote opverve. 't Zal nit väöl koste, ze zunt nog al kot va sjtiel. En ich blief mit de allermitste hoeëgachtoeng der pastoeër va Lutterendal. Aha... op 't litste do zette, e wul doch pastoeër i Lutterendal blieve.
[pagina 19]
Groonesjild Mèèlkop Wat vraogte da an der bussjep vör te bedanke? Jiddenvals dè breef mot hei blieve, wè wit wat der bussjep zich do oet versjteet. Hannes Andesj... ene breef... va iezer en stoal! Dat mot gezaat zieë... mè van de knets, do hat e nuuks va gesjrève, en och nit, dat de jonkheid nit ka trowwe.... Sjniederke Ozze hèër, dè is es went-e i Lutterendal wüer geboare en getòage... dè sjprikt va leefde vör zie volk.... Hannes 't Sjient, dat e och de ouwe hillige wilt laote opverve... ze hant 't nüedig... wat zal e opkiekke, went e dizze nuje hillige Sint Martinus kriet... da... nee... dè Martinus, dat is te groaf... Sjt.-Bebke Ongenieëdig, wat waor is, is waor. Groonesjild Sjrikkelich, sjrikkelich! Mèèlkop Dè is sjun, ezu is ginge in de ganse sjtriëk. Hannes Hèër lieërer, dèr hat ieër van ur werk! Hr. Lieërer Dò han ich gans Oke väör aafgesjtrupt, van op ene maat nao 't theater, va dò nò gen hotmanspief en doew nò Botsjed en witste woeë ich 'm vong... der fiengste va gans Oke... in de Sint Jokkebskirk.... Groonesjild ... In de Sint Jokkebskirk?... Dèr hat 'm doch nit gesjtoale? Hr. Lieërer ... Nee, mer dò han ich gòa vroge, wòa ze dem howwe gegowwe en doew moeët ich no Wuesjele! Hannes No Wuesjele... dè! Mèènlkop En doew? Hr. Lieërer Ja... doew bin ich no Wuesjele gerist: Da mot 'r va Oke mit de lectisje, aater Oke rets um, der berg op en da bis te nog lang nit dò! Groonesjild ... Mit de lectisje! Hr. Lieërer Mer, dat is winniger. Vèr hant 'm! 't Hat meute gekost, mè noe kumt 't sjlimste. Roant ins wat dè kost? Groonesjild ... De vrouw va mich hat 'n Moddergoddes gegole... ongenieëdig... nit al' ezu groeët... die kost 30 Mark. Hr. Lieërer Onnuuezele man,... 30 Mark!... Sjniederke Dè Martinus, dè kost 't dobbele, nit woer, hèër lieërer, en nog mieë. Hr. Lieërer En väöl mieë. Mèèlkop Ich ming, da wuur-e evvel och duur. Hannes Went e nit duur is, da is 't och nuuks. Dè mot 80 Mark koste!...?
[pagina 20]
Hr. Lieërer Wat hat dèr versjtand va hillige... dè Martinus... dè kost 180 Mark. Alle Hè...? da...! nee! Groonesjild Hèër lieërer, ich ming... dat wuur te väöl, 180 Mark... der haove pach van 't kirkegutje! Mèèlkop Do haste e sjtaats rink väör, väör 180 Mark. Hèër lieërer... nee... ich ming dat wuur te väöl. Hannes ... 't Is allelee... e is och fie - e is hei en e blieft hei. Laot vèr de collect tille. Went vèr te kot koame, da gèèf ich nog get draa. Hannes Ich han 30 Mark. Sjniederke Dat is väöl... ich han 'r 25. Hr. Lieërer Makt 55... dèr Groonesjild. Groonesjild Ich han er 15...... Hannes Dèr must uch sjame... mit 15 Mark. Groonesjild ... 't Is ene sjlèëte tied... allewiel! Mèèlkop Ich han och mer 10 Mark... deèëpel koste bò nuuks, de eier 4 cent... gèèf da mer. Hr. Lieërer 30 en 25 en 15 en 10, dat is 80 Mark. Hèëre, dat is 100 Mark te winnig. Groonesjild Hè... 100 Mark,... dat hei ich nit gedaat. Widder, ich gèèf och nog ene daalder. Mèèlkop Jo... ene daalder gèèf ich och. Hannes Dat hulpt nuuks. Groonesjild ... Ja... ich ming... da motte vèr 't bild mer truk sjikke. Hannes ... 't Bild is hei en 't blieft hei, al collecteere vèr 100 jaor. Hr. Lieërer Dat ming ich och. Sjt.-Bebke Widder-wat, zow vèr 't Berbke ins laote kòame. 't Berbke, dat wit mesjie raod. Ich gòan 'm ens hòale... (af).
2e scène. Mephisto staat bij de tafel van de kerkmeesters, als gewoon heer gekleed. Later werpt hij vluchtend zijn mantel af. Mephisto En zow dat woer zieë... dat hei 'n koel kieëm? Sjniederke De siedoeng sjrieft 't... ich ming... da zal 't wal ezoeë zieë. Dis daag hat ene hèër 't mich vertild... igge Mamelizerveld. Mephisto Erm Lutterendal... hat dèr mesjie al ins gehoeëd van ene lavasjtroom? Ne lavasjtroom in de vuurspujende berg. Went dè uvver der krater hèr kumt, geet-e landsem brennend berg-aaf... dan is der berg
[pagina 21]
vol vuur... en dè lavasjtroom verbrent al... hoezer, beum, ganse durper... en de luuj... Ezu is de koel! Ze kumt en begint igge Mamelizerveld... ze breit zich oet, kruupt wiejer berg op en berg aaf. Ze brikt de hoezer aaf, mieënt 't koan en der terref e-weg, riet de kirk a gen eëd en hilt vör ginge... en wò ze is gegange... dao kont 'r zieë, dò is alles sjwat... Dèr zut hei huuj nog bei-ee. Mè uvver 'ne mond of 6 sjteet hei e hotel en da biljarte dao in de zale, ander luuj, beambte, döktesj, advokate, landmèëtere, mesjie direkteure. Hannes En de kirk, wat zat dèr van de kirk...? Mephisto Die brèëke ze aaf... Dèr kunt jo 'n kirk bowwe op Mechele aa, of tusje Osjbich en Vols... Wat hant vèr an 'n kirk... De koele zunt vör de kòale. Groonesjild Da zaan ich uch, da bin ich d'r tège! Mephisto Kiekt dò, dò aove dat is urre beuisj, dè is van de gemingde! Wie groeët is dè beuisj? Mèèlkop Dè is 223 hektare. Mephisto En dò nève links en rets? Groonesjild Dò liet der Heuverbeuisj en der Heuzulder en rets dè va Mechele. Mephisto Dò bowwe ze 4000 hoezer. Hannes Wè bowt...? Dè beuisj is van os en dem verkoope vèr nit! Mephisto Laot vèr kot zieë. Hei is de kaat va Lutterendal. Dò aove dat is van der Groonesjild, dat zunt 10 hektare... Groonesjild En wat wilt dèr do mit? Mephisto Ich bin der direktor van de koel. Groonesjild Ich verkoop do nuuks. Mephisto 10 hektare... dèr kriet 50.000 gulde. Groonesjild 50.000 gulde!... Mephisto Wilt dèr 't verkoope? Groonesjild O wieë... hèër... jòa! Mephisto En hei liet der Mèèlkop mit 't zient, 9 hektare, dat zunt 45.000 guide. Wat tunks uch? Mèèlkop (draait zijn glas wat tusschen zijn vingers). Ja, hèër, kiekt, kan 't nit get mieë? Mephisto Laot mer, vèr onteegene 't. Mèèlkop Nee, hèër, 't is good, mieë wie good. Sjtienebebke!... bring os allenei nog ee, mè wo is 't Sjtienebebke? Sjniederke Hèër ich han e witje! Mèèlkop Ezu get wie 'ne sjottelsplak. Sjniederke 't Liet nit igge Mamelizerveld, mè op ene Liekweg.
[pagina 22]
Mephisto Dat koope vèr nit... En dèr, Hannes va Cottesse... 4 hektare... dèr krit 40 doezend, umdat 't 't sjunste land is. Hannes (met de vuist op de tafel slaand). Wat... verkoope?... mieng zieël en mie lève, mie geloof en mie durp. Vör 'n hand vol geld! Dèr makt os erm no lief en zieël. - Dèr geft os geld en nemt os de velder en de weie en 't broeëd oet der mond. Dèr makt os ongeluklich... noe sjtunt al 40-50 jonge en medjere te wade en kunne nit trowwe. Wo motte die hèr? Dèr... dèr zit 't ongeluk va Lutterendal... en der beuisj... dat dèr 't wit... ins hant os veuröddesj gestrèè vör der beuisj te behowwe. Vèr beginne noe op e nuujts mit uch, en da zulle vèr zieë. Mephisto (de kaart opvouwend, heel kalm). Da zulle vèr zieë. Ich zal loate koame - ins kieke - 10.000 saldote... en da onteegene vèr alles. (luid) Mansluuj... noe begint 't sjpel ...noe kumt ze, de koel, de grutste van de ganse welt... dò zunt hei koale, sjwat en glinsterend wie zilver. - Vèr hòale ze oet, en dò kòame koeltöän en berg va koale hoeëg bove de kirk oet... en vrem volk. - En hoeëg bove Lutterendal aove op ene beuisj. (af).
3e scène. Sjniederke Dat waor dè hèër oet 't Mamelizerveld, ich houw 'm nit gekand. Hannes Dèr verloope kels! Ieësj zut dèr tège de koel en noe verkopt dèr alles, de binnede, de velder, ur geloof en ur durp. Groonesjild Os geloof... Mè Hannes, ich versjtoan dich nit. Hannes Nee... dat zal wal... Doot wat 'r wilt... 't is jo noe te sjpieë.
4e scène. Sjtienebebke en Berbke komen op. Berbke Jummich, nee... en mot ich hei in der kaffieë, bei die mansluuj... Sjniederke Komt mer in Berbke... sjenieët uch nit. Vèr zunt mer onder os kirkmeestere. Hannes Mich tunks, vèr weete noe wal raod, vèr konne der hillige Sint Martinus betale... dèr Groonesjild mit die 50.000 gulde, dè dao mit 45.000... ich gèèf och mie paat. Sjniederke Dat is richtig.... Groonesjild Nee... do bin ich nit mit akkood, dè hillige Sint
[pagina 23]
Martinus is e gesjenk van de ganse pfaar en do motte alle luuj aa beidrage. Mèèlkop ... O joa, vör dat noe zelver te betale.... Hannes Da mer wiër! Alzoeë, Berbke... vèr hant os mit dè hillige vliddig verrèëkend. Dè kost 180 Mark, en vèr hant 'r mer 80.... Berbke Jummich... 100 te winnig!... Hannes En do is ginge, dè nog get gève wilt... da motte vèr dè hillige mer truk sjikke. Berbke Zelève nit... dè blieft hei. Noe waat... joa... kiek, ich han nog 40 Mark te gow a loeën. Ich kuuët mich get i vöroet vraoge... ich gleuf 't zal goa... ich kaom sjnak truuk. (af).
5e scène. Sjt.-Bebke Ich ming... vèr muste ins druvver kalle, wie vèr dat dunt mit 't fes. 't Berbke zaat, 't wuur 't bitste, went der hèër e paar daag vör 't fes no Wittem gung in 't kloster. Hannes Do hant vèr nuuks tège, hei hingerte toch mer mit seere en ophange van de sjwung. Went vèr dan der daag vör 't fes de klokke loewe, da zulle vèr 't ezoeë dòa, dat hèë 't i Wittem huuët. Sjt.-Bebke En da motte och de kamere gesjoate wèëde! Sjniederke En wè betalt der polver? Hr. Lieërer Do is nog polver van de bronk. Sjt.-Bebke Vèr muste dan der daag zelver mer allemaol aaftrikke nao Wittem en pastoeër goa hoale. Hannes Wo hat dèr vroluuj 't versjtand... aafhaole en bis Wittem? Vèr hoale-n-'m aaf hei aate bis ‘aggen boom’, en da kan e zelver zieë wie e va Wittem bis ‘aggen boom’ kumt. Sjt.-Bebke Da laot ich 't Thieske mit 't dokkerke aafvare. Da kan e mit 't dokkerke bis aggen boom koame. Sjniederke Ich han mie vadder huure zage, wie der hèër Körver zilliger no Lutterendal is koame, doew hant ze 'm och aggen boom aafgehold en 'm ene kook aagebò, dè gedrage woat durch e ingelke tusje twei lowwerboom. Hannes Ne kook tussje twei lowwerboom... dat is fie. Die lowwerboom gèèl ich. Sjt.-Bebke En ich der kook en da kan 't Angenieëske van der kuster... ocherm - der kook drage... 't is vör te kriesje - ozze urme hèër. Hannes Dèr vroluuj mot mer heem blieve... dat kriesje do kan ich nit tège.

[pagina 24]
6e scène. Berbke (op). Dò dò bin ich wir... en ich han 't geld. Ich vroaget ozze hèër vör der loeën en doew zaat-e, ‘zieëker’ zaat-e, ‘doe has 'm verdind’, en ich zaat ‘hèër’ zaat ich, ‘kun dèr mich nog ge i vöroet gève?’ en doew kèëk e mich aa en zaat: ‘ich begriep dich, dat fes kost väöl geld, hei haste och get va mich en waat, ich han nog e paar goodsjtukskere’ en noe tilt, ich weet nit wat e mich gegève hat. E zaat, ‘'t fes is jo mieë vör de pfaar es vör mich.’ Hannes Marieë Joëzep, wat e geld... vör twei Martinusse, nee kinger, nee, wat ene man! Ich zaan uch, dè pastoeër, dat is ene hillige, kinger noe kiekt, 50-60 en noe wilt dè zich bedanke - zelève nit, 80-90-100 - sjrikkelich - 200 Mark... hillige Sint Sjnieder, wat e geld! Sjniederke Da kunne vèr och nog get polver bei besjtille. Da wèëde de kamere gesjòate, ongenieëdig. Absjeulich, dat 't krakt bis aate deep iggene beuisj, wat zat dèr Groonesjild, dèr zat nuuks. Groonesjild Ich daat an de koel... 't is toch sjlim. Ezunne pastoeër, en dan verkoope. Hannes Begriept dèr 't noe? Dè pastoeër hè? Groonesjild Ja... en dan, me kan jo ummer nog zieë, sjpieëder gift de koel mesjie nog mieë. Hannes Wie zoeë? Groonesjild Ich ming mer. Hannes Dèr mingt mer, dèr zut nit wèèd, dat dèr i Lutterendal left. - Ich goan no heem. Mit ezunne minsj wil ich nuuks mieë te doa han. Went ze 3 judasse iggen sjmid bei-ee houwe, da kriege ze nog nit inge wie dèr zit, ezu verkensvliddig. Berbke Marië - Deus - mansluuj - in ene Goddes-naam - wat gift dat mit 't fes. Hr. Lieërer Nee... Hannes noe blieft... vèr hant uch nuuëdig! Dèr kont sjpieëder jò doa wat 'r wilt. Groonesjild Ezu han ich 't nit gemind... ich han jò och nog nuuks verkoad... Verexcoesieëd Hannes, went ich get väöl gezaat han. Hannes Ich zal dat nit vergèète, mienge leeve man, en went 't fes nit wuur, da wuur 't tussje os twei oet (gaat zitten). Hr. Lieërer Wat ich wool zage... kiek, dè Martinus... dè mot och mit gòa, went vèr pastoeër gunt aafhòale. 't
[pagina 25]
Fiengste wuur, went 4 Martinusse dem dreuge op 'n baor... der Tinus van 't Grit, der Tien oet gen Hulvet, der Antoeën van 't Marie. Sjniederke Dat is ginge Tinus. Hr. Lieërer Dat is waal inge! Sjniederke Der Antoeën! Hr. Lieërer Morloot, dèr hat rèët. Jiddenvals dò zunt wal 4 Tinusse te vinge. Ich zal ze wal bezurge. Berbke Ich han mit der hèër gesjpròake. 't Is good, e geet no Wittem. Went me 40 jaor pastoelër is, zaat-e, dan is 't good zich ins e paar daag mit Ozze Hergod te besjprèëke. Ich zaat... en da kun dèr ève good 't ovves ur bottermilk han... ich zal uch alles i pakke... der breveer, de sjloebbe, 't sjèèrmets en e paar krèèg. 't Is ene minsj wie e kink! Wat zal e zich vruije, went e dè hillige Sint Martinus kriet. Ocherm, e hat al ezu lang gekald van ene nuje hillige Sint Martinus, en dè... noe... dò, ezu sjun, ezu sjun, mer... ich mot no heem, ich han de bottermilk op sjtòa.
7e scène. Rox en Puntjes komen op. Puntjes Is dat hei, dat 't feskomitee bei-ee is? Dèr zut get aan 't regele, mer went dat mer lukt... de harmenei... die deet nit mit. Hannes Watte...? Rox De jonge zage... der polver wet betald, ze hant geld vör der hillige Sint Martinus, da motte ze os och mer betale. Groonesjild Dat wet good. Hr. Lieërer Do begint 't al. Hannes En wat mot dèr? Puntjes Ich ming... dat kamere sjieëte... wè betalt mich dat? Hannes Morjuuts... wo geet dat hint Zit dèr dat bild do? R. en P. Dè, is dat 'm! Sjtaats!, dè zal wel klinke! Rox Ich han de vaan van de harmenei mitgegoole... die koostet 100 Mark. Hannes 100 Mark... wat hat dèr versjtand va hillige? Dè kost 180 Mark. Puntjes Hooo! Ich ming do hèj me d'r beno twei vuur. Hannes Twei zo'n hillige wie dèr zit, mè ging twei hillige Sint Martinusse, en wit dèr wè dat betalt? Rox Ja?
[pagina 26]
Hannes Pastoeër, - de collect hat mer 80 Mark bei-braat. Vèr komte 100 Mark te kot, en pastoeër alling hat 200 Mark gegève. Rox ... Zoeë? Hè - nee da zulle vèr mer mit doa! Dan is dat andesj. Puntjes Jo... dan is dat andesj... mè andesj ming ich, jo dat is dan ezu wied in òader. (beiden af).
8e scène. Hannes En da mot dèr hèër lieërer aggen boom 'n sjpruch houwe. Mer 't mot 'n fieng zieë. Do koame luuj va Mechele, Ieëpe, Volz en nog wiejer. Dèr mot wal d'r vuur zurge, dat de vroluuj nit an 't kriesje koame. 't Is wie ich zaan, do kan ich nit tège. Dat is onder andere de rèè, dat ich nit getrowd ha. Went inge kriesjt, da veul ich dat in mienge maag en da wet ich krank en bezondesj op dè daag... makt 't mer fosj en hel... dat me 't wied huuët... en da mot 'r mer dri zitte dat 't gekkewerk is te dinke a bedanke. Me zow zage, wie ne minsj do aa kieëm. Hr. Lieërer En wè gift 't bloomebokit? Hannes Dat mot dèr zelver doa! Hr. Lieërer Wo mot v'r die goa gèèle? Hannes Goa gèèle? Dèr geft 'm bloome, die vèr hei hent in de weije en 't veld, woste oet rüks 't kòan en ozze terref. 't Sjunste is ummer der kroetwusj, ne kroetwusj op Moddergoddesdaag, gèèl en blàò en roeëd... ezu mot 't zieë. Groonesjild ... En wat dunt vèr mit kaplaon? Sjniederke Ja, dò hauw nog ginge aa gedaat. Dat weet ich och nit. Hannes Kaplaon... dè geet aater 't Angenieëske of vuur der hillige Sint Martinus. Sjniederke Mesjie kuste vèr 'm lote vare in 't dokkerke. Hannes Nee..: e geet te voot juus wie vèr och. En nuuks mieë ter taofel zeende... hat dèr 't beer oet?... sjleet ich de vergadering. - Proost! (drinkt uit).

Vorige Volgende

Tweide bedrief

1e Scène.

2e scène.

3e scène.

4e scène.

5e scène.

6e scène.

7e scène.

8e scène.