ek de lêste leafde út dizze libbens ferdwûn binne, allinne siktaris Jelles fielt wat fan de djippe smert oer dit ferstjerren by de âlden.
Yn de tsjustere efterkeamer, dêr't kofje en koeke ree stiet, sprekt dominy Douwes Dekker noch in wurdmannich fan treast en moed; en dan geane hy en siktaris Jelles al wer fuort; want beide moatte hja om healwei twaën wer.
De begraffenis fan Laerman baron Tinnegieter, dy blinder, dat is wat oars! Efter de wein fan ‘De laatste Eer’ ride alve auto's en dan komme, geandefoet, in protte boeren, boskwachters, fêste arbeiders en oar personiel en ek ôffurdigen fan gâns ferieningen. Alle leden der ek noch efter, dat koe fansels net, mar de measten steane al kreas ferklaaid op it tsjerkhôf; dy fan ‘Apollo’ mei de ynstruminten by harren. Lebbing hat in liende swarte hoed op, dy't him wat te grut is en dy't er sa altemets foar syn eagen weiskoot.
By de yngong stapt alles út 'e auto's; hearken, wat in grutte en hege lju! No't Laerman baron Tinnegieter dea is, no is fan alle kanten de famylje en de âlde kunde opsetten kaam. Twaris wurdt de bier om 'e tsjerke droegen, alle folk der efteroan. Parsefotografen sitte op hege treppen, dy't hja yn 'e buorren liend hawwe, en knippe en draaie mar. Wat in begraffenis! In lyts buoike komt oer, mar it binne drippen en gjin heilstiennen dy't derút falle, en it duorret mar even; dat let neat.
As de kiste yn it famyljegrêf sakket, spilet Apollo in treurmars. It hie dy fan Chopin wurde sillen, mar dy koe Lebbing der net mear sa gau yn krije; dêrom is it in ienfâldiger nûmer. Dit is plechtich en moai; Hylke Berga rôlje de triennen oer de wangen, sa moai is it en sa giet it him oan. Mar de widdo fan Laerman baron Tinnegieter sjocht nei it bûkelhôf; hja is muzikaal en heart wol, dat it mei de suverens fan it lûd better koe. Wiete fuotten kriget hja ek; as dominy Douwes Dekker no aanst mar net te lang praat.
Dat sil har noch net iens tafalle! Dominy riddenearret noch frijwat in skoft: oer de goede eigenskippen fan Laerman baron Tinnegieter, syn stil goeddwaan, syn stipe oan it ferieningslibben
Auteursrechtelijk beschermd