Logo DBNL
Het Walchers liedeboeck (1611)

Het Walchers liedeboeck

(1611)–Dirk Schabaelje, Jan Philipsz. Schabaelje–rechtenstatus Auteursrechtvrij

Vorige Volgende

[Och hoe condt ghy verblyden]

Na de wijse.
Alsmen schreef duyst vyfhondert

 
+OCh hoe condt ghy verblyden
 
O mensch int quaet ghegront
 
Daer u ziele moet lyden
 
Synde ter doot ghewondt
 
Van de sonde gheslaghen
 
Dat felle scherpe sweert
 
+Hoe condt ghy die smerte draeghen
 
Hoe can v de doodt behaghen
 
+Ist leuen v niet beter weert
 
V Ziele is den cancker
 
Onderworpen, en sy
 
Wert daer duer noch al crancker
 
+Maer hoe macht comen by
 
Dat ghyt' niet te verdryuen
 
En pocht, op dat ghy meucht
 
Met fraey ghesonde lyuen
 
In heylichtyt beclyuen
 
Vervult met cracht en nieuwe ieucht
 
Hoe comt dat soo gheneghen
 
V herte is, om gaen
 
Periculeuse weghen
 
Daer valsche stricken staen
 
Duysterheyt te beminnen
 
Segt hoe het comen mach?
 
Soudt ghy niet eer beginnen
 
Te stellen uwe sinnen
 
Op den claer schynenden dach
 
Waerom hebt ghy tot slapen
 
Ghenuchte ende sin
 
Staet lieuer in de wapen
 
Gheharnast dat niet in
 
Dyn huys en soude treden
 
Den gheest die altyt waeckt
 
En na syn oude seden+
 
Doorwandelt alle steden
 
Off hy ergen in gheraeckt
 
Dunckt u soo wel te smaken
 
Babels doodtlick fenyn
 
Dat ghy soo weynich haken
 
Hebt na den nieuwen wyn+
 
Welcken men u te schyncken
 
Soo milde presenteert
 
Om niet muecht ghy hem drincken
 
Wilt u dwaesheyt bedyncken
 
Dat ghy t'ander om gelt begeert
 
Hoe cont ghy wat ghenuchten
 
Rapen in sodoma
 
En in d'egipsche vruchten
 
Gaet loth en moyses na
 
Poocht wt t'midden te vlieden
 
Want blyft ghy noch in haer
 
Met de verdoomde lieden
 
Sal v straffe gheschieden
 
Haer grouwelicke plaghen swaer
 
+Om dat ghy s'Hemels eruen
 
Weygert sult ghy eer lanck
 
Het selue moeten deruen
 
+Noch teghen uwen danck
 
Om dat ghy mamon aencleuen
 
Wilt bouen Gode, siet,
 
+Sal v werden ghegeuen
 
D'eeuwighe doot voor tleuen
 
Voor groote vreucht eeuwich verdriet

Weest op u hoede.


Vorige Volgende