Capm. xxviii van ghebroken been beneden die knien.
Int been vanden knien nederwaert siin twee beenen. Een been dat groot is ende is gheheeten crux. Dat ander is cleyn ende is gheheeten focila. Ende het ghevalt dat een breect alleene [ende somtijt beide te gader. Ende alst cleine breect] soe est beter te ghenesen ende te ristaureeren dan dat grote. Ende dat clein breect inwaert ende dat grote breect uutwaert. Ende als si beede breken soe siin si veel quader ende swaerder te ghenesen ende te ristaureren. Ende alser een ghebroken is dat is herde goet te bekennen want het voeghet tot welker siden dat men wille. Ende men sal dat been alsoe cuereren als men den arm cuerreert want haerder beider broken ende haerder beider curen siin alleleens. Nochtans wil Albucasus seggen dat men enen ghebroken been maken sal twee spaenre alsoe lanc als dat been is vanden knien nederwaert tot den voeten toe. Ende dat een spaen leggen op die een side vanden beene ende dat ander spaen op die ander side. Ende die sal men boven die banden binden met drie banden op elc eijnde een ende in die middewaert eene opdat hi dat been niet roeren en sal als ic u hebbe gheseit vanden ghebroken dijen. Ende die vroede meesters seggen dat men dat been sal legghen in een kiste van houte ghemaect na die lencte vanden beene omt beroeren vanden beene. Ende ghi sult dat weten lieve kinder al ist dat ic niet en hebbe ghescreven sonderlinghe van alle den ghebroken leden. Nochtan moechdi herde wel nemen exsempel aen alle dese [die ic] daeraf ghescreven ende gheseit hebbe.
Auteursrecht onbekend