Boeck van surgien

Capm. xiiij [van bossum] dat is den cossum.

Bocium is een vleeschachtighe aposteme ende coemt in die kele ende is gheheeten in duiitsche croppen onder die kele ende coemt aldermeest den wiven aen ende is gheheten der onder huit. Nu suldi weten dat sulc comet van natueren ende sulc van aventueren. Albucasus seit dat dieghene die van natueren coemt ende mach men niet ghenesen noch en besciet geen medecine. Maer die comt van aventueren die mach men ghenesen op dat hi clein is. Ende die cuere is datmen sal sniden ende metten sack uut trecken soe datter niet en blive vanden sacke. Dan seldiit naijen ende daerop legghen werc ghenet in dat witte van den eye of in water of in wiinedic dat die humoren niet doer en trecken ende dat bloet dick werde daerna cureret totdat ghenesen sij. Maer ghi sult u hoeden dat ghi niet en sult sniden met jser daert in pesen es [vergadert] ende in aderen ende arterien ende oec in geenen groten bocium. Mer men sallen wederstaen metten lichaem te purgeren. Als ghi beghint die flegmon te purgeren asetosum (?) Ende dat is pulver van turbit ende hi sal luttel eten ende drincken ende hi sal hem hoeden van water te drincken ende van alderhande grover spisen die node smelten in die maghe ende die cout siin. Ende siin spise die sal siin wel ghesoden ende wel ghebraden. Ende siin broot sal siin wel ghehovent ende licht ende siin vleesch sal siin van jonghe hamelen j jaer out ende gheiten ende kieken ende paertrisen ende dies ghelike ende haren wiin sal siin root ende claer ende van goede roke ende smake.