|
| |
Ghebedt voor den ontfanck vanden heyligen Sacrament des Outaers.
Totter tafelen uwer suete maeltijt, goedertieren Heere Iesu Christe, ick arm sondaer gheensins my beroentende van mijn eyghen verdiensten, maer betrouwende op uwe bermherticheyt ende goetheyt ontsie ende schroome my te gaen. Want mijn herte ende mijn lichaem heb ick met veele boosheden besmet: mijn verstant ende tonghe met wijselijck bewaert. Daerom o goedertieren Godtheyt, o schroomelijcke hoocheyt, ick arme in benautheyt geuonden, wederom loope tot v een fonteyne der bermherticheyt, tot v haest ick om gesont te worden: onder v bewaernisse loop ick: ende den
| |
| |
ghenen die ick geenen rechter en can verdraghen, dien versuchte ick te hebben tot eenen salichmaker. Ick thoone v o Heere mijn wonden: ende mijn beschaemtheden ontdecke ick v. Ick weet dat mijn sonden sijn veel ende swaer voor de welcke ick sorghe. Ick hope op uwe bermherticheden der welcker gheen ghetal en is. Siet op my met de ooghen uwer bermherticheyt Heere Iesu Christe, een eeuwich Coninck Godt ende mensche, om den mensche ghecruyst. Verhoort my die daer in u hope: onfermt v mijnder die daer vol catijuicheyt ende vol sonden ben ghy die de fonteyne der bermherticheyt altijt sult laten vloeden. Weest ghegroet ouersalige offerande voor my, ende voor alle den volcke aen de galge des Cruycens gheoffert. Weest gegruet edel ende seer precioose bloet wt de wonden van den ghecruysten mijnen Heere Iesu Christo vloyende, ende die sonden vande gantsche werelt afwasschende. Ghedenckt o Heere uwer creature die ghy met uwe bloet verlost hebt: het is my leet dat ick ghesondicht hebbe; ick begheere te beteren t'ghene ick ghedaen hebbe. Neemt hier om o aldergoedertierenste Vader alle mijn boosheden ende mijn sonden af, op dat ick ghesuyuert zijnde inder herten ende inden lichame, weerdelijck mach smaken t'heylich der heylighen, ende verleent my, dat die heylighe voorsmakinge ws lichaems ende ws bloets (de welcke ick onweerdich meyne te ontfanghen) zy een quytschellinge van mynen sonden: zy een oprechte
| |
| |
suyueringhe van mijne misdaden: zy een verdrijuinghe van alle leelijcke ghedachten, zy een vernieuwinghe van alle goede gheuoelen, zy een volmaecktheyt van alle goede ende v behaghende wercken: ende mijnre sielen ende lichame teghens alle listen van mijne vyanden een vaste bescherminghe. Amen.
| |
Noch een ander Ghebet voor het ontfanghen, welck S. Thomas Aquinas ghemaeckt heeft.
Almachtich eeuwich Godt, siet ick gae tot den Sacrament ws eenichs gebooren Soons Iesu Christi: ic gae als een crancke tot den medecijn des leuens; een onreyne tot de fonteyne der bermherticheyt: een blinde tot den lichte der eeuwigher claerheyt: een arme ende behoeftighe tot den Heere des Hemels ende der eerden. Hierom bid ick de oueruloedicheyt uwer onghemeten miltheyt, dat ghy mijn crancheyt wilt ghenesen: mijn onsuyuerheyt wasschen: mijn blintheyt verlichten: mijn armoede rijck maecken: mijn naecktheyt cleeden: op dat ick v o broot der Engelen, o Coninck der Coningen, ende Heere alder Heeren ontfanghen mach met al sulcke groote reuerentie ende ootmoedicheyt: met sulcken berouwe des herten ende deuotien: met sulcker suyuerheyt ende ghelooue: met sulcken propoost ende meyninghe alsoo dat mijnder sielen salicheyt van noode is. Ick bidde u gheeft my het Sacrament mijns Heeren lichaem ende bloet met alleen te nutten, maer oock de cracht | |
| |
ende deucht des Sacraments. O alder sachtmoedichste Godt, verleent my dat lichaem ws eenich ghebo[ren] Soons ons Heeren Iesu Christi, d'welck hy vande maghet Maria ontfanghen heeft op dat ick in sijn geestelijck lichaem mach gheincorporeert, ende onder sijne ledekens gerekent worden. O alderliefste Vader gheeft my uwen beminden Sone, den welcken ick nv in desen wech bedect dencke te ontfanghen ten lesten met ontdeckten aensichte eeuwelijck mogen aenschouwen, die daer met v leeft, etc.
| |
Ghebet van S. Thomas Aquinas nae het ontfanghen.
Heere heylich Vader, almachtich eeuwich Godt, ick dancke v dat ghy my onweerdich sondaer deur uwer bermherticheyt, sonder alle mijn verdiensten, ws Soons ons Heeren Iesu Christi versaedt heb. Ende ick bidde v dat dese heylighe ontfanghenisse my niet en zy tot straffinghe, maer een salich middelt to verghiffenisse. Laet my dat wesen een wapinghe des gheloofs, ende eenen schildt van eenen goeden wille. Laet dat wesen een wtwasschen van mijne ghebreken, ende een vernielinghe van oncuysscher begheerlijckheyt, en onbetamelijcke ghenuchte: een vermeerderinghe der liefden der verduldicheyt, der ootmoedicheyt, ende der ghehoorsaemheyt: een vaste beschuttinghe teghen de listen van alle mijne vyanden sienlijcke ende onsienlijcke: een volcomen ruste der beroeren, soo licha- | |
| |
melijck als gheestelijck: een vaste aenhanginghe in v alleen die daer zijt mijn warachtich Godt, mijn leuens een salighe voleyndinghe. Ende ick bidde v oock dat ghy my sondaer brenghen wilt tot uwer onsprekelijcker maeltijdt daer ghy selue met uwen Sone ende met den heylighen Gheest zijt uwe Heyligen een waerachtich licht, een ouervloedighe versaedinghe: een eeuwighe blijdtschap: een volcomen ghenuchte: ende een eeuwige vreught. Amen.
| |
Een ander dat S. Bonauentura ghemaeckt heeft.
Deursteeckt alderliefste Heere Iesu het merch en t'binnenste mijnder sielen, met de alderliefste ende heylsaemste wonde uwer liefden, met een waerachtighe ende schoone, ende Apostolicksche alderheylichste liefde, op dat mijn siele altijt quele en smelte alleen door minne en verlanghen van v, datse v begheere ende beswijcke in v voorhouen: en begheere ontbonden te worden ende niet v te zijn. Geeft dat mijn siele nae v hongere die daer zijt dat broodt der Engelen die versterckinge der heyliger sielen: ons dagelijcks broot, ende ouerweseluck, hebbende alle sueticheyt ende smaeckelijckheyt ende alle vermaeck der lieflijckheyt, nae v (in wien de Engelen begeeren te aenschouwen) moet mijn herte altijt hongerich zijn, ende eten ende met die sueticheyt ws smaecks, moeten vervult worden die binnenste mijnder sielen. Nae v moet sy dorstich zijn, die daer zijt de fonteyne des leuens, de fonteyne der wijsheyt ende der wetentheyt; de fon- | |
| |
teyne des eeuwighe lichts; de beke der wellusten; die vruchtbaerheyt van Godts huys v moetste altijt nerstelijck begeeren; v soecken; v vinden; tot v strecken; tot v comen; op v drincken; van v spreken; ende alle dinghen wercken tot lof en glorie ws naems met ootmoedicheyt, ende bescheydentheyt; met minne ende vreucht; met ghewillicheyt ende ghehardticheyt, met volstandicheyt totten eynde toe: ende ghy alleen weest altijt mijn hope; gheheel mijn betrouwen: mijnen rijcdom; mijn vermaeck; mijn lusticheyt; mijn blijdtschap; mijn rust ende stillicheyt; mijnen vrede; mijn lieflijckheyt; mijnen reuck; mijn sueticheyt; mijn spijse; mijn sterckinghe; mijnen toevlucht; mijn hulpe, mijn wijsheyt; mijn erfdeel; ende mijn besittinghe; mijnen schat inden welcken mijn verstant, ende mijn herte altijdt ghevesticht ende vast ende onbewechelijck gewortelt moet zijn. Amen.
| |
Een ander na het ontfanghen.
Heere Iesu Christe ick bidde uwe onsprekelijcke bermherticheyt, dat het Sacrament ws lichaems ende bloets (d'welck ick onweerdich ontfanghen hebbe) moet my wesen een suyueringe van mijne boosheden, een sterckinghe der crancken: een vaste bewaringhe teghen des werelts perijckelen: een verweruinghe der genaden: een beuestinge der gratien, een medecijne des leuens, een ghedenckenisse uwer passien: een vasticheyt teghen die swaecheyt: een wegh-broot van mynder reysen. Dat self de wilt my wtgaende, gheleyden: my | |
| |
dolende wederom brenghen; my wederkeerende, ontfangen: my wanckelbaerich houden: my vallende, oprechten: ende my volstandich blyuende, in de glorie ende heerlijckheyt brenghen. O alderhoochste Godt die salighe teghenwoordicheyt ws lichaems ende bloets moet de rancken mijnder herten alsoo vernieuwen dat ick sonder v gheen soeticheyt en vinde: gheen schoonhet lief hebbe: geen onmanierlijcke liefde en soecke; gheenen troost en begeere: geen wellusticheyt toelate: nae geen eere en vraghe, noch gheen wreetheyt en vreese: die daer leeft ende regneert met Godt den Vader in eenicheyt des heylighen Gheests, Godt, uv, ende in eeuwicheyt der eeuwicheden. Amen.
|
|
Auteursrechtvrij