Wilhem de Derde

[p. ***2r]

Ad Virum Nobilissimum & Tersissimum, Lucam Rotgans, Cum aeterni operis carmine heroico Belgica Ejus Musa Gulielmum III. Britannicum, Principem Optimum celebraret.

ROTGANSI Vatum Princeps, quos Belgica Clio

AEternis meritos vexit ad astra modis:

Qui primus patrium ad Vechtam deducere Musas

Ausus, & heroae condere vocis epos:

Quam bene purpureis tua stat subnixa cothurnis

Clio, & regificis intonat arma sonis!

Hic stupeo REGISGULIELMI maximagesta,

Bella tot, & forti parta tropaea manu:

Ut veniat, videat, vincat; reddatque saluti

Regna, Urbes, Populos, Foedera, Jura, Sacra.

Ut Bovinda Illi submisso flumine ripas,

Ac Thamesis pronas gurgite praestet aquas:

Utque tot auspiciis per plurima gesta secundis

Foedifragas Galli conterat acer opes.

Hic comes it Magno Regi Prudentia, Virtus,

Et sancta constans cum Pietate Fides.

Auriacum legimus mansurum in saecula Nomen,

Heroas veteres, Semideumque Genus:

Fulget inexstinctum sidus REGINA MARIA ,

Cui pietate parem Saecula nulla dabunt.

Has verax laudes Divae, Regi que merenti,

AEternis cantas Arma Virumque modis.

Augusta, fateor, Tibi dextra Phoebus Apollo,

ROTGANSI, Aonias ipse ministrat aquas:

[p. ***2v]

 

Quin etiam Musis lucum addit Regia Virtus,

 

Ut decus a gemma bacca nitente capit.

 

Nec Tibi nugatrix mendacis fabula saecli,

 

Ilias aut Dido nec repetenda fuit.

 

Candida Simplicitas veri Tua Carmina sacrat,

 

Carmina, quae quondam Dique Deaeque canent.

 

Haec tamen ut vere cantes, tersissime Vatum,

 

ROTGANSI, Musae dulce decus Patriae:

 

Lector utroque Tuos laudet vel pollice versus,

 

Mistaque purpureis aurea mala rosis:

 

Pace Tua dicam, GULIELMI carmina dextrae

 

AEmula fulmineae nulla Thalia canet.

 

Ille decus Regum est, quo nil augustius uno

 

Vel fuit, aut olim, qua patet Orbis, erit.

 

Non possunt claro lucem addere lumina Phoebo,

 

Maxima nec versu crescere Fama potest.

 

Haec Magni laus est GULIELMI maxima, quod cum

 

Carmina Eum celebrent plurima, nulla satis.

 

Rite tamen cantas, ROTGANSI candide, Regem ;

 

Sola decet Musas Purpura sacra Tuas.

 

Pro jure & meritis Rex Regum maximus Ille est,

 

Dignus ab aeterna posteritate cani:

 

Belgarum merito Vatum Tu maximus audis,

 

Dignus ab aeterna Posteritate legi.

Honori & Meritis Nobilissimi

Auctoris faciebat

Henr. Chr. de Hennin, D. & in Elect. Athenaeo, quod Duisburgi Cliviorum floret, Artium salubrium & Humanior. Prof. Publ.