Over-Ysselsche sangen en dichten

Onvermogen.

Soo weynich als men wijn wt netelen can drucken,
Soo weynich als den moor can bleycken zijne huyt,
Soo weynich als de losch sijn vlecken wisschen wt,
Soo weynich als men mach van dorens vijgen plucken,

Soo weynich als een steen hem rechten kan of bucken,

Soo weynich als een trom van sellef slaen geluyt,
Soo weynich sonder vocht opschieten can het cruyt,
Soo weynich sonder saet den lantbou can gelucken,

Soo weynich als een pot self wasset wt de aerd',

Soo weynich als een kint hem selven teelt of baert,
Soo weynich als een lijck can ploegen ofte delven,

Soo weynich als een huys wort sonder hant gesticht,

Soo weynich als den dach comt sonder t'sonne-licht
Soo weynich heeft den mensch het goede van hemselven.