De CL Psalmen Davids, eerst in Nederlantschen dichte gebracht door Petrum Dathenum, ende nu in sin ende rijmen gebetert

(1640)–Jacobus Revius– rechtenstatus


Psalm Cxx. ALs ick met droefheyt was beladen
[Folio Q8v]
Ick riep tot God, en uyt genaden Heeft hy geneyget syne ooren Om mijn gebeden te verhooren. Van onbeschaemde laster-monden, En valsche lippen ongebonden Die booslijc schenden mijne eer Wilt mijne ziel doch redden, Heer. 2 Wat can de valsche tong' uytrichten Met haer vergiftich leugen-dichten? Wat baten de geveynsde streken En al het leelijck leugen-spreken? 'tZijn scherpe pijlen, die een stercke En cloecken schutter stelt te wercke. Sy geven een soo heeten gloet Als brandenden jenever doet. 3 O wee my! dat ick dus moet swerven
[Folio Q9r]
In Mesech, en Gods wooning' derven! Dat ick in Kedars tenten blijven Moet, daerse niet dan boosheyt drijven! Mijn siele wort het al-te-bange Dat ick verkeeren moet soo lange Met die den vrede dragen haet Als ofse waer het meeste quaet. 4 Ick ben genegen tot den vrede, Maer als sy mercken uyt mijn rede Dat ick na eendracht heb verlangen Alsdan sy moeyt en krijch aenvangen.