Mestreechter veerskes

[p. 18]

Vermaoning

Mestreech, is diene fong nog good,
zoe stevig wie in vreuger jaore?
Toèn waor veur diech 't hoegste good:
ier en rechsjaopenheid bewaore.

En noe....? Noe konkelt, wee mer kaan,
noe bedelt hebzöch in d'n straote,
en nied drijf Jaan en allemaan,
dee jaog op bäönsjes, ier en baote.

Noe stoon de huicheleers veurop,
en vrowlui, die hun ier vergete,
zie drage nog verwààand de kop
boven d'n dweil vaan hun gewete.

D'n egoïs weurd riek en vèt,
heet God, meh nèèt 't geld vergete;
wee ierlik blèèf veur God en wèt,
dee kèn vaan ermooi neet mie ete.

Wat res miech nog in diech, mien stad?
'ne koeie geis dwaolt door d'n straote:
de bèste naom weurd nog beklad,
me kèn 't lastere neet mie laote.

Ao, pas toch op, mie good Mestreech!
diech bès t'n eige graaf aon 't graove,
laot toch dien helder Stareleech
ziech neet in duusternis begraove.

4-6-'45.