Album Joannis Rotarii (Johan Radermacher)

[fol. 154v]

[101. Lucas de Heere, Antwoord van de Malcontenten.]

Response

Les malcontens, fourvoyez, par malheur
Aux biens Contens, ne portant hayne au coeur
Escouttez bien contents, le malheur quy nous mayne
Et le Diable quy a engendre nostre payne
Cest envye pour vray, et desir de regner,
Quy veullent nostre maistre et nous tous ruyner.
Nos biens, et nostre honneur sentons par nos messuz
Du tout salliener dont sommes tous confuz
Et sy serons forcez en fin a nostre honte
De confesser que mal avons [-ny du peuple support] faict nostre conte
Des villes plus navons ny du peuple support
Voire taschent du tout a nous donner pasport
Voyant que nostre but ne tend qua dominer
Et lheur de la Patrie en malheur terminer
Bourreulx vous nous nommez du Pape et la sequelle
Parce que maintenans, sans regard, sa querrelle
Et sy nous alleguez la deue recompense
Que le Roy nous fera pour loyer de l'offence
Nier nous ne saurions, et confessons par force
Que par nous advenu ne soit ce grand divorce:
Et que rayson nayez de vous malcontenter
De noz trop grands mesuz ponct nen fault contester
Confesser il nous fault, car l'offence est trop clere:
Que rebelle enfans de la Patrie mere
Sommes dignes d'ouyr tous brocars et injures
Pourveu que ne soyons nommez doubles parjures
En payne nous trouvons, plus que bien nosons dire
Et en noz coeurs couvons un remors quy desire
Que fussions raliez come helas soulions estre
Mais chascun de nous veult (quest le mael) estre maistre
Que mauldict soit celluy, quy commenca la dance
Et quy des malcontens lheur desire et avance,
Et Dieu doint a tous ceulx quy dentre eux ont vouloir
De samender quen brieff le fassent apparoir

Finis