Album Joannis Rotarii (Johan Radermacher)

[fol. 150r]

[97. Anoniem, Lied op de slag bij St. Quentin, 1557.]

Chanson de la Journee de St Laurens anno 1557

[Links:]

Rosignolets francois
chantes a haulte voix
nostre belle victore
escripte pour memoire
le jour de St Laurens
pour Bourgignois vaillans

Vous scaves habillier

et bien gazouillier
desployer voz gorgettes
entonnes chansonettes
et dittes nous pourquoy
sestonne vostre Roy?

Le tourc est son cousin

le pape son voisin
tous deux lui font caresse
pour amour ou finesse
il est lappuy de tous
pourquoy fuyt il les coups?

Les bourguignons conduictz

par soubzddards et reduitz
soubs le Duc de Savoye
luy ont tollu sa [-gloire] joye
sa gloire et son honneur
et font trembler de peur

Francois neez pour fuyr

Sainct Quentin secourir
pensoyent par audace
mais bourguignons en place
sopposerent a eulx [-comm]
comme gens valereux

A cheval messeigneurs

qui veult conquerre honneurs
dit le Duc de Savoye
je lui monstray la voye
car certes je le scay
faisant mon coup defray

[Rechts:]

Ne craindez point amiz
grand nombre dennemis
qui n'eurent oncq victoire
au moins daulcune gloire
sinon par trahisons
foullans nobles maisons

De leur sang suys yssu

neantmoins me ont decu
par leur dure cautelle
ungne trahison telle
qu ilz ont tous mes pays
par leur fraude en[v]ahys

Dieu leur doibt aujourdhuy

la paye dennemy
du tort et grand oultrage
quy me font/ Sus courage
allons a eulx tout droi[-c]t
calengeons nostre droict

Lors pour franchois facher

on vyt bien tost coucher
en arrest mainte lance
au dur regard de france
quy femmes ney trouva
mais hommes esprouva

Les femmes ny sont plus

ains hommes resoluz
de graver pour memoire
leur eternelle gloire
dessus les fuyards dos
des franchoys sans repos

Quatre mille chevaulx

Bourguignons fiers et chaulds
deffirent sans demeure
des franchois en peu dheure
ung grand nombre infini
Dieu seul en soit benny

[fol. 150v]

[Links:]

[J+]/Tournee oyssies lors

la campaigne des mors
et les nobles de franche
par pistolets et lance
abbatuz par fureur
mourir a grand douleur

Et tant de prisonniers

ung peu avant sy fiers
aux bourgignons se rendre
et leur mercy attendre
sans ung seul coup ferir
de crainte de mourir

Franchois *puadariseurs*

l arrogans et vanteurs
apprendes a vous tayre
ou mieulx combattre en guerre
comme matins mordants
vous combattez des dens

Mesdisans blasonniers

des princes et seigneurs
vous imprimes sans honte
ung tas dinfame compte
a la reste ma foy
rien ne vault vostre alloy

Vous naves que le plaist

vray soubzdars ont le faict
vous luires et ordures
ne sont plains que *dhorjures*
le langaige en est doulx
toute la honte a vous

Car Dieu qui tout cognoit

soubstient enfin le droict
et vous faict apparoistre
que ung meschant ne peult cognoistre
tousjours la verite
plaist a sa maieste

[Rechts:]

Vous estez tout trompeurs
de nature et de coeurs
en vous ne a foy aulcune
que selon la fortune
tous gens sans loyaulte
des la nativite

Violeurs dorphelins

conspirateurs malings
usurpateurs iniques
perturbateurs publicques
ennemis des Crestiens
confederes des chiens

Voz enormes peches

de tous costez preches
vous mainent a ruine
par vengeance divine
car *regner*[-violent] longement
ne peult roy violent

Ce tiltre tres Chrestien

ne vous sert plus de rien
que de reproche et blasme
lusurper vous diffame
les vallois lont perdu
ilz sont turcqs devenu

Mieulx leur duict le Croissant

quilz portent maintenant
car cest du turcque lenseigne
esperent lune plaine
mais plaine de malheur
leur damat le Createur

Et doinct a nostre Roy

paisible juste et coy
rapporter les trophees
des gaules conquistees
allons nous aurons paix
une fois pour jamais

Plus est en dieu

Sillyers