Album Joannis Rotarii (Johan Radermacher)

[fol. 128r]

[81. Anoniem,Lofdicht op niets (nieuwjaarsgedicht).]

Vis tibi Januariis donem de more Kalendis

Munus; habe mirumque insolitumque: NIHIL.

Ringeris an rides? sed ride si sapis, Aule:

Nostra nec invitâ suscipe dona manu.

Nam NIHIL hoc isto laudandum in Carmine cernes

Magnoperè; et certum est: NIL avida aure bibes.

Scilicet egregium munus, NIHIL, inquis, habebo?

Quaeso manè: magnum hic dixeris esse NIHIL.

Caussam vis? Dicam: NIHIL est Fundisque Domoque

Gratius, et Censu divite, pingui et Agro.

Carum auro contra NIHIL est, praestantius immò

Est NIHIL; et NIHIL est quod mage quisque petat.

Sed si fortè lucrum spernis, Mentisque potenteis

Quaeris opes; habeas has tibi: SCIRE NIHIL.

Quam NIHIL exoptant quibus est Constantia cordi!

Quàmque NIHIL metuunt, mutat eosque NIHIL!

Felices quorum famam NIHIL auget iniquam:

Felices et qui commeruêre NIHIL.

Ecce, Nihil quam sit praestans: Lusorque Neposque

Post cuncta effusa, hoc servat uterque tamen.

Quid retinet iuvenis malè cùm decoxerit omnem

Rem patriam luxuque ingluvieque? NIHIL.

Mors cùm cuncta domet; NIHIL IMMORTALE RELICTUM EST:

Quin vel in [-hoc] hoc Mortem perdomat Orbe NIHIL.

Peccas tute NIHIL? quis te neget esse beatum?

Laedis tuque NIHIL? quis neget esse pium?

Si NIHIL EST; iubeo securum à furibus esse

Quòque voles tutum carpe viator iter.

Si NIHIL EST, RAPIAS-VE NIHIL; securus ab omni es

Iudice, Iure, Foro, Carcere, Supplicio.

Si capiti Bromius gravis est, BIBITO NIHIL, Aule:

Si gravis est stomachus, tunc iuvat ESSE NIHIL.

Summa: NIHIL potuit facere aut servare beatum,

Qui NIHIL ipse sibi praestitit, aut aliis.

[fol. 128v]

[blanco]

[fol. 129r]

[blanco]

[fol. 129v]

¹

Nihili encomion

1 fol.128v en 129r zijn blanco