Album Joannis Rotarii (Johan Radermacher)

[fol. 117r]

[71. Marcellus van Eversdyck, Nieuwjaarsgedicht voor Johannes Radermacher, 1601.]

Strenarum vice, Rademachre docte;

Paucos, illepidos, severiores,

Mitto versiculos, inane munus

Gratanter capias, quod est amici.

Non quales helicon, vel alta montis

Parnassi iuga nutrivere quondam.

Dignos spurcitia improbis idolis,

Mendax Graecia quae colebat olim.

Immundi Sathanae irretita fraude.

Cultores similes sui, prophanos,

Mendaces; Genii Gulae, atque ventris

Reddens mancipia, omnibusque fumos

Vendens ne capiant futura secli

Aeterni bona; sed beatitatem

Totam constituant in hacce vita:

Caecatos, rapiat sub ima tetri ut

Inferni loca; rideatque semper

Plenos tristitia, igneisque poenis.

At quales Patribus dedisse primis

Hebraei referunt canentem Adamum;

Doctum colloquio dei, Angelorum

Lapsu, notitiaque mysticorum,

Eheu, per proprias originalis

Labes criminis, et privationem

Primae iustitiae, deique visus,

Quam sit grande nefas, et expiandum

Flagro multiplici, dei favorem

Non quaesisse iugem, vel expulisse:

Luget posteritas quod omnis usque.

[fol. 117v]

1

Auxerunt alii pii sequaces,

 

In quos insiliit dei tremendi

 

Maiestas, bonitas, timorque purus,

 

Vates efficiens, probos, pudicos,

5

Sacros, veridicos, deique amicos.

 

Qualis legifer extitit Moyses,

 

Et Regis titulo David decorus,

 

Et longo ordine nobiles Prophetae.

 

Quorum vigilias sacro labore

10

Consummavit Iësus ipse, dictis

 

Hymnis, versiculis, metrisque, quando

 

Caenâ Gethsemanim recessit actâ:

 

Nec non in medio doloris aestu,

 

Atque hymnis obiens necem volutis,

15

Consecravit opus, Patrique gratum

 

Curavit fiëri omne, quidquid esset

 

Scriptum tempore quolibet, Poëta

 

A quocunque pie, deique zelo.

 

Quales muneribus beäre multis,

20

Et post funera clariore fama,

 

In terris honorare novit: atque

 

Assumptos locat inter Angelorum

 

Sanctorum agmina caelicosque cives,

 

In caelestibus atriis receptos

25

Plenos laetitiâ, suavitate,

 

Plenos laudibus, atque amore sancto:

 

Non tantum ore, sed omnibus medullis,

 

Cantantes modulos deo sonoros,

 

Idque in perpetui momenta secli.

[fol. 118r]

1

Faelices ter, et amplius profecto

 

Qui sic conciliant dei favorem,

 

hymnis, carminibus, potente versu.

 

Ô si me annumeret supremus istis

5

Iudex Vatibus, et piis Poëtis,

 

Quali sidera transmeäbo cursu?

 

Et sistar domino, caputque lauro

 

Ornatus, fidibus canam suäve,

 

Et sublime melos, in omne tempus.

10

Ô des optime dona tanta Iësu.

 

 

15 januarii 1601.

 

M.E.

[fol. 118v]

[blanco]

[fol. 119r]

[blanco]

[fol. 119v]

Carmen c.v. ¹

Marcelli ab Eversdyck, de Christianae Poësis excellentia, mihi pro strena donatum mense ianuario anni M.DCI.

1 clarissimi viri