Bouck der bloemen

Die xxxiiiste een goede bloem gheheiten. grootmodicheit.

Magnanimitas in latijn is in duytschen te segghen groetmoedicheit die vant ic mede onder die edele bloemen dar sij doch een af is van groten prijse. Ghij sult weten dat groetmodicheit en is oec gheen hoemoet noch hoverdie mer het is een edel doecht daermene vele lelicheit van sonden mede versmaet: want een sterckmoedich man kent hem selven te goet daer toe sonde of quaet te doen. Ende wie groetmoedich is die draget een groet hertte vol doechden omme cleet mit eeren ende mit rechtverdicheit. Tullius seit die moet van enen groetmoedighen man wort bekent bij sijnen hoghen werken Groetmoedicheit heeft veel goets op der erden ghebracht. want ten was nie dier noch dinck ter werelt also fel noch soe sterck noch soe scerp noch soe wreet ten is mit eenen minschelijken moede verwonnen gheweest.

Desen is te ghelijken bijden geervalc die soe groet van moede ende soe edel is dat hij liever den doot van hongher an ghinghe dan hij stinckende vleesch of vuyl aes eten soude. ende altoes pijnt hij na grote voghele te vangen ende spart die cleyne. Alsoe behoert den groetmodighen man mechtighe lude aen te vechten ende te berespen van sondelijken daden ende van ongherechticheit dier sij veel hanteerden in allen landen. Ende cleyne of arme oetmodighe lude sal hij laten in vreden in rusten. Die bij deser ernstiger moghenheit die glorie vanden hiemelschen rijke beghert te vercrighen. op dat hij bijden grade sijnre goeder lovelijker werken op climmen moghe totter hoechster zale die hij beghert heeft. Aldus moghen wij mit wel doen onse leder selve tymmeren hier inder erden. daer wij mede climmen willen ter hiemelscher vrouden.

Mit enen groetmodighe hertte. stont moyses voer den coninc pharao ende vraechde hem waer omme hij tvolck van israel niet van hem en woude laten scheiden alsoe hem god die coenheit in gaf. Starmoedich ende vroeme in gode waren josue ende caleph doen sij den heidenen lande over die jordane verspriet hadden ende seiden totten volke van israel gae wij vrijlijck tot hem op waert ende laet ons hoer lande besitten wij sullense wel winnen.

Groetmoedicheit dede den inghelschen coninghen vele strijden doen winnen tegen den fransoysen die hem onghesien te winnen waren. Groetmoedicheit dede troyen winnen daer menich groet volc in was ende vele groter heren. Sij dede die goede cipio die stad van karthago winnen. Sij dede den goeden keyser lodewijc van beyeren .ij. strijde winnen teghen den

[p. 99]

hertoghe van oestrijck. Sij dede hertoge willem van hollant den strijt winnen mit cleynen volke teghen den ghestichte van ludick mitter hulpe gods ende bijstandicheit des hertoghen van burgonden sijnen swagher die hij tot sijnre hulpe ghebeden hadde.

Men leest inder hystorie van romen hoe dat een machtich here orlogede teghen die van romen dese here was gheheiten pirus ende hadde bij hem dien hij wel betrouwede een meester van medicinen. die wel kende dat die romeyne rijc waren van goede ende van gelde. Ende dese medicus screeg heymelijc aen dij van romen wouden sij hem gheven sulke summe ghels als hij begherde hij woude sijnen heer vergeven Die romeyne antwerden hem weder wt hoerre groetmoedicheit dat sij alsulker dienst niet en begherden. Ende en wouden sijnen heer niet winnen mit sulker lelijker verraderie mer mitten swerde ende mitter moghender hant. ende lietent desen pirus weten dat hij hem wachten soude voer sijnen meyster dat hij van hem niet en worde vergheven noch verraden.

Groetmoedicheit is een eerbaer doecht.
Die den menighen heeft verhoecht.
Weest coen in goede ende niet vervaert.
Soe wort u loff ende eer vermaert.