Dordrechts lijstertje

[p. 1]

[A.A. Platers Boertighe Liedekens.]

Aen-spraek van Roemer tot Segher.

Stem: Lestmael was ick tot vryen genegen, &c.

SEgher, jy selt niet bedyen,
Al jou doen is veel te loom,
Ie meent dat jou 'tgheluck sal vryen:
En dat dunckt my maer een droom:
Ick beken dat ghy de maet

[p. 2]

 

Van veel dinghen wel verstaet // gheswint:

 

Maer jy moet, waer datje bint

 

Snoeven, wilje zijn bemint.

 

 

 

Iy en sult tot staet niet comen,

 

Doeje niet na mijnen sin,

 

Ie moet als ick me lustigh roemen,

 

Anders comje nieuwers in,

 

Roemer heet ick seer bequaem,

 

En ick aert nae mijnen naem // niet mis,

 

Want ick roem van als gewis,

 

Oft schoon meest al jocken is.

 

 

 

Mijns ghelijck is niet te vinden:

 

Soo byster als ick ben gheleert:

 

Ick verstae my op de winden

 

En hoe dat den Hemel keert,

[p. 3]

 

Graden, Streken, oft Planeet,

 

Ia wat Teycken of Commeet // ick kan,

 

Soo jy't noeyt en hoorden man:

 

Iou veel wonders segghen dan.

 

 

 

Ick heb eertijts al veel door-wandelt,

 

Soo wel te water als te lant,

 

Ghenegoceert en veel ghehandelt,

 

Tot aen s'weerelts eynt, byrant,

 

In Peru en Africa,

 

Oost en West tot in China // langhs heen,

 

Lestmael quaem ick noch ghereen,

 

Daer noch Son noch Maen en scheen.

 

 

 

Wilje vanden Oorloch spreken?

 

Daer van weet ick wonder groot,

 

Niemant was by my geleken

[p. 4]

 

Int kampen met de Spaense Vloot,

 

Was ick niet de principael?

 

Doen ick vanden Admirael // de vlack

 

Boven vande stengh af brack

 

En ick stacks' in mijnen sack.

 

 

 

By Heemskerck was ick van ghelijcke,

 

Die wert geschoten aen mijn zy,

 

Ick riep, t'sa mannen, laet ny blijcken

 

Dat ghy sijt Batavieren vry,

 

En met Olivier van Noort,

 

Viel ick menigh Kraeck aen boort // al streck,

 

Syd' en Sulver was maer dreck,

 

Niet als Gout had ick ghebreck.

 

 

 

Menigh Roover en Vrybeuyter

 

Clampten wy in schijn van vrient,

[p. 5]

 

Daer nae heb ick langh voor Ruyter

 

Onder Bacxs te peert ghedient:

 

Gheen Bataly oft geen Tocht,

 

Ick hebs' over al versocht // seer dra,

 

Int schip was ick, dat Breeda

 

Korts veroverde daer nae.

 

 

 

Rijnberck dat heb ick helpen winnen,

 

Gheertruydenbergh en oock ter Sluys,

 

'Ken sout niet al konnen versinnen:

 

Maer ick heb't op-schrift noch tuys:

 

Noyt en kreech ick schoot noch wont:

 

Maer ick ben noch fraey ghesont // van Lee:

 

Te Tuernout en in Vlaenderen mee

 

Was ick, en by Breaultè.

 

 

 

Wat heb ick menighe trotse Karel

[p. 6]

 

Ghebrocht op Sainctinel perdù,

 

Mannen by gout gelijck een Parel:

 

Maer 'twasser som' een qua venù:

 

Want het quammer so op an,

 

Datse vloghen boven van // de meer

 

Vielen voor mijn voeten neer,

 

Selden quammer een of weer.

 

 

 

'Tis niet te Segghen, watte cluchten

 

Datmen inde Leghers siet,

 

Vreeten, suypen met ghenuchten,

 

Singhen, springhen, gheen verdriet,

 

Krijchter hier een deel heur kaes,

 

Gunder sijnse weerom baes // seer rap,

 

Mettet lieve Venus zap

 

Maken al weer ander knap

 

 

[p. 7]

 

Wat was ick op de Minne-streken

 

Eertijts oock een Craey byget,

 

'Khadt nau een Meyt van deech bekeken,

 

O Lieve man, sy was int net,

 

Iae al wast een Vrouw getrout,

 

Strack had ick de Man bekout // gheringh,

 

Ick son hem maer heen om wingh,

 

Of om mostaert en asing.

 

 

 

Trouwen, dat's gheleen, ghebleven,

 

Noeyt sach ick mijns Meesters werck:

 

Maer ick heb my nu begheven

 

Te gaen, je weet wel, inde Kerck,

 

Lieve man, wat soume doen?

 

Dat belet veel quaet vermoen // altijt

 

En het gheeft, waer dat je zijt,

 

Vry wat aensien en credijt.

 

 

[p. 8]

 

Wat belanght de vrije konsten,

 

Die acht ick minder als een pluym,

 

Retorica weet ick op 'tronste,

 

Rondeelen heb ick op mijn duym,

 

Iae ick derf mijn roemen plat

 

Datmer geen en vint in stadt // als ick,

 

Buffels moghent wesen dick,

 

Sy verstaender niet op't stick.

 

 

 

Wel wat souder moghen wesen,

 

Dat my int verstant ontdoock?

 

Ick heb Iosephus heel ghelesen,

 

Den Opganck vande Griecken oock,

 

Waer ick sit, oft stae, oft legh,

 

Streck heb ick een Boeck ewech // en hoe

 

Dat ick lees, ick wort niet moe,

 

En 'tverstant dat valt my toe.

 

 

[p. 9]

 

Somma, sou'ket al verhalen,

 

Den dagh die viel my veel te kort,

 

Of den asem sou my falen,

 

Daerom, eert noch later wort,

 

Seger leert vry roemen noch,

 

Waerom wilje schamen toch // voor wien?

 

'Twort veel eer gelooft by tien,

 

Alster een sal gaen besien.

Reyn liefd' betoont.