Hugo

[p. 11]

Hugo

So wan dei Hugo ben sidon na dorosei e naki pokoe. Dan di a si taki en tante Martha ben waka e kon, Hugo bigin bari krei. Hugo hori en bere èn a ben lolo na gron. En mama skreki. A lon go loekoe san psa nanga Hugo.

Mama taki: ‘Mi mama! Hugo san psa nanga joe!’

[p. 12]

Hugo taki: ‘Mama, loekoe. Tante Martha e kon. Mi here no foeroe moro. Tante o njan ala a njanjan.’ Mama ati bron. Dan a lon go teki a sibi. Ma bifo mama ben drai kon baka Hugo opo lon.

Di tante kon na inisei, a aksi mama san psa nanga Hugo. Mama piki en taki: ‘We, a boi disi no abi maniri. Nownow mi kba bori. Mi kan poti pikinso njanjan gi joe?’

Tante piki: ‘Ija, baja. Sensi mamanten mi no njan noti ete.’

Di Hugo si taki mama gi tante njanjan, Hugo bari: ‘Mama, mi e dede. Angri e kiri mi.’

Mama taki: ‘Efoe mi kisi joe tide mi no sabi san o psa nanga joe.’ Dan mama poti njanjan gi Hugo. Di Hugo kba njan a go sribi. Dan di a wiki, tante Martha ben gwe kba. Mama ben sribi. Hugo gwe go prei voetbal.

Di Hugo kon na oso a ben de mofoneti kba. Hugo go wasi moi. A weri krin krosi dan a go sidon njan. Mama taki: ‘Hugo, te joe kba njan dan joe moe go teki wan losi fowroe gi mi na tante Martha. Ma wan sani mi e begi joe. No tan te o lati.’

Hugo piki: ‘Ja, mama. Mi no o kon lati.’

Di Hugo kba njan a teki pasi go na en tante. Di Hugo de tapoe pasi kba, a taki nanga ensrefi: ‘Efoe mi boro na a berpe, mi e doro esesi na tante

[p. 13]

Martha. Ma efoe mi waka lontoe, dan mi o weri.’ Hugo no prakseri langa, a boro ini a berpe.

A ben doengroe kba. Fosi joe teri tin, dan Hugo ben doro na tante Martha. A taki odi. Dan Hugo taigi en tante taki en mama seni teki a losi fowroe. Tante taki: ‘Mi boi, taigi joe mama taki mi no ben man losi a fowroe moro. Ma tamara mi o losi en froek'froekoe, dan mi srefi o tjari en kon. Taigi en no meki a mandi mi.’

Hugo taki: ‘A boen, tante. Mi o gwe.’

[p. 14]

Dan di Hugo e waka gwe dan a si wantoe mati foe en. Den aksi Hugo: ‘Kon meki oen go bai bami.’

Hugo taki: ‘0 fara wi o go bai en?’

Den taki: ‘Let' djaso tapoe a oekoe. A no fara. Wi o bai wan bami gi joe toe.’

Hugo draidrai, a taki: ‘Meki oen go esesi.’ Dan di den bai a bami den tan wan heri pisten e sidon loekoe teevee ini a warung. Di den kisi densrefi, a ben de twarfoe joeroe mindri neti kba. Hugo skreki. A taki: ‘Meki oen gwe now. Mi mama o kiri mi!’

Den boi no ben wani gwe, ma tokoe nanga boen foeroe taktaki foe Hugo den waka gwe. Di den doro

[p. 15]

na a boro pasi pe a berpe ben de, wan foe den boi taki: ‘Mi no e waka dja. Mi o waka lontoe.’

Den trawan taki: ‘We, dan joe wawan o waka.’ Dan fa a berpe ben doengroe den no ben man si so boen pe den ben waka. Den ben waka tapoe den grebi. Dan na waka fa den ben waka, wan foe den fadon ini wan grebi-olo. Den jere taki wan sani fadon. Ma den waka go doro. Ma di den jere wan sma bigin bari: ‘Waaaai, oen kon jepi mi,’ so den boi bai dija foetoe, den lon gwe.

Di den doro na tapoe a bigi pasi den kon si taki Hugo no de. Den stop lon. Dan den bigin lafoe taki wan foe den boi ben krei.

[p. 16]

Ma nanga boen foeroe moeiti Hugo kmoto ini a oio. Nanga tokotoko skin Hugo lon kmoto ini a berpe. Di Rendi san ben waka lontoe, si taki wan sma ben lon kmopo foe a berpe, a koti a strati abra dan a bigin lon. Di den trawan si san e psa, denlafoe Rendi. Rendi ben lon kon na a seipeden trawan ben tnapor. Den graboe en hori. A bari: ‘Oen loesoe mi. Mi si takroesani!’

Den trawan e dede nanga lafoe. Den taki: ‘Na Hugo joe si.’ Dan Rendi kisi ensrefi èn a bigin lafoe toe. Dan di Hugo doro, a no ben moi moro.

[p. 17]

Dan Rendi aksi en: ‘Hugo pe joe bami de?’

Hugo ben gagoe fa a ben skreki. A taki: ‘Mi libi en ini a olo.’ Den boi lafoe te den no man moro. So den tjari Hugo go na oso.

Hugo mama ben wakti en nanga wan bigi tiki na mofodoro. Di a si taki Hugo e kon nanga den boi en ati ben de na djompo. Ala sortoe sani mama ben denki. Di den doro na mofo a doro, Rendi ben lafoe te a no ben man moro. Den trawan srefi bigin lafoe. Hugo mama e loekoe san e psa. Hugo ben tnapoe e loekoe en mama. En mama taki: ‘San e psa dja? Joe e tnapoe loekoe mi leki wan leigi awari dan den trawan e bari lafoe. San psa?’

Hugo no man taki bika a frede taki en mama o naki en nanga a tiki. Ma wan foe den boi teki wan dek'ati dan a ferteri mama san psa. Mama srefi bigin bari lafoe dati a ben kon bigin sari en boi.

Ma leki fa oen sabi taki bigisma taki: Tori switi, ma bari moes tapoe.