Hugo

[p. 6]

Degee

Di Degee Welis ben sidon na ini vijfde klas a no ben wani go na skoro moro. A no ben denki fara èn heri dei a ben sribi ini klas. So a no ben sabi foeroe. Dat meki froek'froekoe a bigin wroko leki sjowman.

Baka wantoe jari a teki wan frow èn a kisi wan boi nanga en. A boi ben nen Dennis. Degee frow ben sorgoe boen gi Dennis èn a ben abi ten gi en. Ma Degee no ben loekoe en na wan ai. Te a ben kmoto foe wroko, dan efoe en frow no poti en njanjan klari tapoe a tafra, dan a ben meki trobi nanga en. Wanwan leisi a ben go koiri nanga en frow. Ma moro foeroe a ben go sidon taki tori nanga en mati te lati a neti. Dan te en frow ben aksi en pe a ben kmoto, dan a ben kosi en.

So wantoe jari kon pasa, Dennis ben sidon ini vijfde klas. A heri jari a wroko tranga èn a leri en les boen. Degee no ben sabi srefi ini sortoe klas Dennis ben sidon. Di skoro tapoe, Dennis ben abra go na zesde klas. Di a go na oso a poti en rapport ondro en matrasi. Dan a go ini en papa kamra. Di a opo a krosi kasi, a opo wan bigi dosoe pe soso boekoe ben de. Di a poeroe a derde boekoe a feni a rapport foe en papa di a ben sidon

[p. 7]

ini vijfde klas. Di a loekoe na inisei a si soso redi cijfers. Dennis lafoe: ‘Hahaha. Jongoe, a no spot' don mi papa ben don, jèrè.’ Dan a prakseri: ‘Mi o poti papa rapport tapoe a tafra. Dan mi wani si san a o doe.’ Soleki fa Dennis prakseri, na so a doe. Dan a go sidon leisi wan leisiboekoe na ini a foroisi.

[p. 8]

No langa na baka Degee kon na oso. Di a waka kon na ini a foroisi a loekoe tapoe a tafra èn a si D. Welis tapoe a rapport. A teki a rapport dan a loekoe na inisei. Di a si den redi cijfers a graboe Dennis ori. Dennis skreki. Dan Degee hari

[p. 9]

en riem poeroe, dan a taki: ‘Heri jari mi wroko so tranga, dan tokoe joe no doe noti?’ A gi Dennis wan steifi fonfon, dati a ben broko sweti. Dan a poti Dennis sidon baka ini a stoeroe èn a taki moro fara: ‘Te joe wani joe kan opo joe mofo.’ Dennis ai ben lon watra.

[p. 10]

Baka wan pisten mama kon doro oso. Di a waka kon na inisei a taki: ‘Degee, san doe joe? Fa joe e broko sweti so?’

Degee taki: ‘A no a keskesi boi foe mi tan sidon. Ne mi prit' en skin gi en.’

Mama taki: ‘A no kan!’ A aksi Dennis di ben krei ete: ‘Pe joe rapport de?’

Dennis no taki noti, ma a lon go teki en rapport ondro a matrasi, dan a langa en gi mama. Mama loekoe inisei. A taki: ‘Degee, san doe joe tide dan? Loekoe dja. A boi abra go na zesde klas.’

Degee loekoe èn a si dati a ben troe. Dan a teki a rapport tapoe a tafra èn a loekoe na inisei. A bari wan bigi lafoe. Mama nanga Dennis loekoe so ferwondroe. Dan Degee graboe Dennis na en anoe. Dennis bari: ‘Mama, jepi!’

Degee taki: ‘Tan tiri boi! Mi no doe joe noti. Jere dja, joe wani sori mi dati joe e leri boen moro mi?’

Dennis taki: ‘Ija, papa.’ Mama hari dipi bro. Degee ben e sjen fa a ben fon en boi foe soso, ma tokoe a aksi en boi pardon foe di a fon en foe soso.

Foe datede: ‘Te joe o meki wan spotoe, joe moe wegi boen san joe o taki.’