Hugo

[p. 1]

A Pomerakbon

Henny nanga en fo pikin brada ben go njan vakantie na den granmama. Henny ben de wan trangajesi boi. Ala leisi en granmama ben bari en te a ben go zomaar ini a pomerakbon.

Wan dei en granmama ben wasi krosi. Dan a seni den boi go prei. Baka wan pisten birfrow kon loekoe granmama. A taki: ‘Bigifrow, fa foe joe dan?’

Granmama taki: ‘Mi de heri boen. Dan fa ai go nanga joe dan?’

Birfrow taki: ‘We, ai go heri boen. Ma mi kon soekoe wantoe pomerak.’

Oma piki: ‘A boen.’ Dan a kari; ‘Henny, kon piki wantoe pomerak gi birfrow.’ Dan granmama gi Henny wan saka, èn a taki: ‘Birfrow, wakti pikinso, mi o poti aleisi tapoe faja.’

Di granmama si dati a saka ben foeroe, a bari: ‘Henny, a sari. Joe kan saka now.’

Henny piki: ‘Wakti, granmama. Mi si ete wantoe lepi wan.’ Dan a tai en empi, èn a foeroe en empi nanga pomerak. Dan a saka. A poti den pomerak san ben de ini en empi na ondro a bon, dan a tjari a saka gi en oma. Granmama gi birfrow a saka, dan a tjari birfrow go na mofo a doro.

[p. 2]

Dan Henny kren go baka ini a bon. Di den trawan kon na oso, den lon go teki den pomerak san ben de na gron. Di Henny si taki den trawan teki en pomerak, a taki: ‘Te mi saka, oenoe sa si san mi o doe nanga oenoe!’ Fa a taki a sani dati, a fadon kon na gron, èn a naki en fesede na a bontompoe. Dan so a kisi wan koendoe na en fes'ede.

Den trawan bigin lafoe en. Henny mandi èn a bigin lon baka den. Den lon gwe nanga den pomerak go na granmama. Granmama broko wan wipi, dan a taki: ‘Te joe wani joe kan naki den.’

Henny taki: ‘Oma, ma den teki mi pomerak.’

Granmama taki: ‘Den kisi joe moi. Joe gridi toemsi. Joe ben piki wantoe kba, ma tokoe joe wani moro. Joe no e kisi noti. Waka go wantron na inisei.’

Henny taki: ‘Oma mi no o naki den moro.’ Dan a lon gwe.

Di granmama kba bori, a poti njanjan gi den trawan. Dan a go wasi krosi ini a was'oso. Di Henny doro oso, a jere fa granmama ben bosro den krosi, a kren go safsafri ini a bon. Ma di wan foe en pikin brada si en, a lon go kari Oma. Oma waka go na a bon. Dan a bari: ‘Mi mama, joe boi Henny. Saka kmoto foe a bon. Na di ja jesi joe abi, no?’

[p. 3]

[p. 4]

Henny saka wantron, èn taki: ‘Mmmmm, oma, joe switi jèrè?’

Oma bari: ‘Joe bitaaa.’ Di oma prakseri san a taigi Henny, a bigin lafoe dati Henny srefi bigin lafoe toe. Oma taki: ‘Esi go njan.’

Baka di Henny kba njan, a lon prei nanga den boi foe birfrow. No langa na baka di oma kba wasi krosi, a go sribi. Dan Henny kon na oso. Di a si dati oma ben sribi a kren go te na ede foe a bon. Dape wan marbonsoe waswasigodo ben kibri ondro wan bosoe lepi pomerak. Fa Henny broko wan pomerak,

[p. 5]

den waswasi soetoe en. A bari: ‘Waaai, mama kon jepi mi,’ èn a saka esesi. A lon go na oma.

Oma skreki ini en sribi. A aksi Henny: ‘San psa, san psa?’

Henny piki: ‘Waswasi soetoe mi ini a bon.’

Oma taki: ‘Joe si? Te mi e bari joe, joe no wani jere! Sani o miti joe. Go wasi joe skin!’

Di a kba wasi, en fesi ben sweri èn a kisi korsoe. Oma gi en krin krosi, dan a tjari en go na datra na baka oekoe. Datra gi en wan spoiti nanga wantoe perki foe dringi te a ben kisi pijn.

Di den trawan kon na oso, dan fa den no si granmama, den bigin doe a oso-wroko. Den no ben sabi notnoti san ben psa nanga Henny. Di oma nanga Henny kon na oso, Henny fosi pikin brada bari: ‘Oen kon loekoe, Oma tjari wan sneisi kon!’

Den trawan lon kon loekoe èn den bigin bari lafoe. Dan en tweede pikin brada aksi en: ‘Henny, fa joe doe kisi sneisi ai?’

Henny loekoe den pikin brada foe en, dan a taki: ‘Waswasi soetoe mi. Ma oenoe e taki dati mi na sneisi. A boen. Ma Oma, san joe e taki?’

Oma san ben poti merki tapoe faja taki: ‘Joe e tan mi moi boi.’ Henny lafoe dan a gi oma wan brasa. Den trawan loekoe densrefi èn bigin lafoe toe.