Fred

Fred go soekoe moni na en granmama

Wan leisi, toe wiki bifo maspasi bo de, Fred go na en granmama. A pisten dati a ben abi tinadri jari. A taki: ‘Granmama, mi wani bai wan langa broekoe gi maspasi. Ma mi no abi moni. Granmama abi tinafeifi goloe gi mi?’

Granmama ben lobi en. So a taki: ‘Disi mi ben kibri

[p. 15]

someni langa gi joe. Tek' dja. Dan te joe go na oso taki joe mama odi gi mi.’

Fred taki: ‘Grantangi, oma. Mi sa gi en odi.’ Dan a waka gwe.

Di a kon na oso a taigi en mama dati oma seni taki en odi. Mama taki: ‘Ma Oma no seni no wan sani gi mi toe?’

Fred taki: ‘Nono, mama. A gi mi tinafeifi goloe foe mi go bai wan langa broekoe.’

Mama taki: ‘Mi boi, jere dja. Mi no abi moni. Joe papa srefi no abi moni. Leni mi a moni foe joe, no?’ Fred loekoe en mama. Mama lafoe nanga en. Dan Fred gi en mama a moni.

Di a moen tapoe Fred go aksi en mama a moni san a ben leni en. Mama taki: ‘Joe boi, san psa nanga joe. Di joe ben de baby, mi gi joe njanjan. Mi sorgoe joe te leki now. Dan san joe wani? We, mi no abi moni. Te mi abi dan mi sa gi joe.’

Fred krei te a no ben man moro, bika a no ben man go njan maspasi na plein.