Fred

[p. 9]

Fred e foefoeroe en papa moni

Ma baka wan pisten Fred prakseri a spaarpot ondro a bedi foe en papa. Papa ben poti ala dei feifi kwartji inisei. A tra dei di no wan sma ben de na oso, Fred go teki a spaarpot. A ben hebi moi. Dan a drai a olo-sei kon na gron. Dan a seksek' en boen. Di wan kwartji fadon kmoto, a taki: ‘Na so, ai.’ Dan a go teki wan forkoe kon. A troesoe en go na ini a olo. Dan te wan kwartji ben fasi na den tifi foe a forkoe, a ben hari en poeroe. So ala dei a ben teki wan bankoe èn bai switi sani foe njan. Ma en wawan ben njan en sani.

Ma wan dei a ben sori Emil fa a ben poeroe den kwartji ini a spaarpot. Ma Emil ben poeroe moro foeroe dan en. Fred ben bari en foe a no poeroe so foeroe, noso

[p. 10]

papa bo kisi den. Dan Emil piki en taki: ‘Dan joe no ben moes sori mi.’

Di papa doro na oso a firi dati a spaarpot ben lekti. En ati bron. A bari: ‘Soema teki mi moni ini a spaarpot?’

Emil taki: ‘Papa, na Fred.’

Fa Fred ben wani lon gwe, papa graboe en ori. Dan papa bigin fon en nanga wan riem. Fred bari: ‘Papa, a sari. Emil teki joe moni toe. Na mi ben sori en fa a ben moes teki joe moni.’

Emil taki: ‘Papa, ai lei gi mi. Mi no sabi noti.’

Papa taki: ‘Foe di joe sori en, dan joe sa kisi moro toe.’ So papa gi en wan boen steifi fonfon.

Dan papa waka go na Emil san ben sidon so tiri tapoe wan bangi. Papa taki: ‘Mi sabi taki joe teki mi moni toe. Ma foesanede joe moe lei taki joe no teki mi moni?’

Emil ben beifi. A taki: ‘Papa, mi no sa foefoeroe joe moni moro.’ Fa a kba taki so, papa gi en wan steifi fonfon.

Dan papa taki: ‘Oen jere dja! Bigin tide mi e poti mi

[p. 11]

spaarpot tapoe a ijskasi. No wan sma e poeroe wan kwartji ini en. Oen jere mi. boi!’

Emil nanga Fred piki: ‘ija, papa.’

Di mama kmoto foe wowojo, a si dati Fred ben krei. A taki: ‘San psa nanga joe?’

[p. 12]

A no piki mama. Papa taki: ‘Den boi e waka e foefoefroe mi moni ini mi spaarpot.’

Mama taki: ‘Te oen wani oen kan doe en baka. Dan mi o leri oen wan moi sani. A no kan, tog. Dan te mi e poti switi sani na ini a ijskasi, dan mi no sabi soema e teki den sani na ini a kasi toe.’

Papa taki: ‘Jere dja, frow. Wi o poti wan sroto gi a ijskasi dan a sa kba. Oen no e kweki foefoeroeman ini a oso dja.’

Mama taki: ‘Ija, dati na wan boen sani.’

Dan papa go bai wan sroto na wenkri dan a poti en wantron gi a ijskasi.