Fred

Fred lasi en tomatiblik

Baka dati Emil ben kon nanga a prakseri foe kibri moni toe. Ma baka wan pisten a njan ala en moni. Ma Fred ben kibri en moni baka a ijskasi sei a gas batra. A ben poti soso kwartji ini wan pikin tomatiblik. Ma fosi a ben poti den kwartji ini a blik, a ben go prei sei a ijskasi. Dan te no wan sma ben loekoe a ben troesoe a moni ini a blik. No wan sma ben sabi a kibripresi disi.

So wan dei wan sani ben psa nanga a ijskasi. Fred mama go teki wan man foe kon loekoe a kasi. A man loekoe na bakasei pe a gas de. A si dati wan kabel ben loesoe. Fa ai tai a kabel, a blik foe Fred kon fadon. A teki a blik èn a seki en. Di a jere dati na moni ben sidon na ini, a poti a blik ini en tas. Di a kba tai a kabel, a leti a ijskasi. A ben drai boen baka. So di mama jere a ijskasi e drai baka, a aksi a man: ‘San ben psa nanga a kasi?’

A man taki: ‘We, frow, na wan kabel ben loesoe na bakasei.’

Mama taki: ‘Dan omeni mi moes pai joe dan?’

A man piki: ‘Joe kan pai mi tin goloe nomo.’

[p. 7]

[p. 8]

Mama pai a man. So a man teki en tas dan a gwe. Dan mama go bori.

Di Fred kon na oso a poti en tas na ini en kamra. A kenki en krosi. Dan a go prei sei a kasi. Di a troesoe en anoe go èn a no firi a blik a skreki. A waka go na en mama. A taki: ‘Mama, soema teki mi moni ini a tomatiblik?’

Mama taki: ‘Sortoe moni?’

Fred piki: ‘A ben de bakasei foe a ijskasi.’

Mama taki: ‘Wakti, mi boi. Wan man ben kon meki a ijskasi tide. Dan na en sa teki a moni.’

Fred bigin krei. Dan a taki: ‘Mama, taigi mi soema na a man?’

Mama taki: ‘Boi, a man gwe kba. Joe no man doe noti moro.’

Wan eri pisten Fred ben krei. A ben prakseri soema na a man? Pe a man ben e tan? Ma noti ben kan jepi en.