Dofi, a paiman

[p. 19]

Rudi

Rudi ben tan na wan bakabini birti. Someni leisi a ben doro lati na skoro. Ala leisi te a ben kon lati, jefrow ben gi en strafoe. Ma tokoe dati no ben jepi. Ne jefrow seni kari en mama, èn a aksi en foesanede Rudi ben kon lati ala leisi. Ne mama piki: ‘Jefrow, oen no abi oloisi na oso, ma tide mi sa bai wan. Dan bigin tamara Rudi no sa kon lati moro.’

Dan jefrow taki: ‘A boen, mefrow.’

So mama go na wowojo èn a bai wantoe sani foe bori. Dan a go na wan sneisi wenkri, dan a taki: ‘Omoe, gi mi wan oloisi.’

Omoe teki a oloisi, dan a gi en keti, èn a taki: ‘Frow, te a oloisi tan tiri, dan joe moe gi en keti na bakasei.’

Mama no ben loekoe san a sneisi ben doe, a arki wawan. A teki a oloisi èn a go na oso. Di Rudi kon na oso, a ben breiti foe si a oloisi. A taki: ‘Mama, mi no sa go lati na skoro moro.’

A tamara mamanten di mama wiki a si dati a oloisi ben tan tiri. A teki a oloisi, a draidrai loekoe a oloisi, a prakseri: ‘Fa mi moes wroko nanga a sani disi? A sneisi ben taigi mi dat mi ben moes gi en keti na bakasei. Ma a no gi mi a

[p. 20]

keti foe a sani disi.’ Mama kari Rudi, dan a taki: ‘Tjari a oloisi gi a sneisi baka, èn aksi en fa mi moes gi en keti. Dan joe e go bai wan saka aleisi na wowojo.’

Rudi teki a oloisi dan a go na a sneisi. A taki: ‘Omoe, esde mi mama ben kon bai a oloisi disi. A taki dat a no sabi fa a moes gi en keti.’

Omoe piki: ‘Jere boi, mi ben sori joe mama fa a ben moes wroko nanga a oloisi, ma a no ben loekoe san mi ben doe. Ma loekoe boen san mi o doe. Na a knop bakasei foe a oloisi joe moes drai, dan ai bigin waka.’ Omoe poti a oloisi ini a dosoe, dan a gi Rudi en.

Rudi teki a oloisi dan a go na wowojo. A bai a saka aleisi, dan a poti en tapoe en ede èn a waka gwe. Ondro pasi Rudi ben firi weri. A go sidon tapoe wan bangi sei pasi. A teki a oloisi dan a taki: ‘Jere mi dja. Omoe taki te mi e drai a knop na bakasei, dan joe e bigin waka. Ma jere, soso mi e weri misrefi nanga joe. Mi sa poti a saka na mi sei, so mi no abi presi foe poti joe. Jere, mi o libi joe dja, dan joe sa waka kon na oso.’

Di a doro na oso, mama aksi en pe a oloisi de. Rudi piki: ‘We mama, mi lib' en tapoe wan bangi sei pasi. Mi taigi en mek' a waka kon en srefi, bika mi ben weri pikinso.’

[p. 21]

Ne mama taki: ‘Joe don boi joe! Fa a oloisi o waka kon en srefi? A no abi foetoe.’

Ne mama teki wan wipi, dan a fon Rudi boen. A taki: ‘A no foe soso mi e gi joe njanjan, èn sen'

[p. 22]

joe go na skoro. Te mi no sab' wan sani, dan joe moes jepi mi. Jere, mi no wan' jere noti san joe wan' taki. A lati kba. Joe e go na skoro. Tek' joe tas dja, èn esi.’

Rudi taki: ‘Mama, joe abi leti. Ma joe o wan' meki jefrow gi mi strafoe baka? Mama, mi lobi joe. Mi sa bai joe oloisi baka.’

Mama loekoe Rudi èn a bigin krei. A taki: ‘Mi boi, gi mi pardon foe san mi doe nanga joe. Mi kisi trobi nanga joe papa tide mamanten, so mi poer' a atibron na tapoe joe. Te a kon, mi sa mek' en boen nanga en. Ma joe na mi wan ai karoe, so tek' moni dja èn go bai a oloisi. Joe naf' go na skoro tide moro.’

Rudi go bai a oloisi. Di a kon na oso, papa nanga mama ben taki switi tori èn bari lafoe. Rudi gi en mama a oloisi. Mama taigi en dati a kan seti a oloisi. Di Rudi ben kba, papa taki: ‘Mi boi, joe de wan koni boi.’

Rudi loekoe en mama. Mama taki: ‘Ai mi boi, a troe san joe papa taki.’

A tra dei di a go na skoro, jefrow aksi en: ‘Foesanede joe no ben kon na skoro esde?’

Rudi ferteri en ala san ben psa. Jefrow loekoe Rudi èn a lafoe. A taki: ‘Ala jari mi e jere wan tra nowtoe.’