Dofi, a paiman

[p. 14]

Professor Koni

Efoe wan sma taki: ‘A man na wan professor,’ dan ala sma e denki dati na wan koni man, wan sma san sabi ala sani. Èn den e si en leki wan gado. Ooktoe den e prakseri dati noiti so wan man kan lei.

So Professor Koni ben gi les na universiteit. Te a ben gi les, joe ben jere te wan pina srefi ben fadon, fa den stoekapikin ben sidon arki en so tiri.

So wan dei, professor kon ini a klas. Dan a taki: ‘Boen morgoe, stoeka meisje nanga stoeka boi.’ A poti en tas tapoe a tafra, dan a taki: ‘Mi fen' wan njoen sani tide baka.’

Ala den stoeka sma ben aksi densrefi: ‘San a man disi o doe baka?’

Dan a teki toe pikin batra ini en tas. Dan a go ini wan oekoe èn a plasje ini wan foe den batra. Èn ini a tra batra a poti pikinso watra, dan a poti wan maggiblok san no ben abi sowtoe, dan a sekseki a batra. Dan a poti den toe batra tapoe a tafra.

Ne a troesoe en wijsfinga ini a batra nanga plasje, dan a troesoe en mindrifinga ini en mofo. A srefi fasi a doe nanga a tra batra. Dan a taki:

[p. 15]

‘Mi wan' sori oenoe nanga di si, dati a plasje nanga a maggiblok watra abi a sref' tesi.’

Wantoe foe den stoekapikin bigin lafoe. Trawan ben taki: ‘A man disi law kba.’

So wan heri djoegoedjoegoe kon ini a klas. Dan a professor taigi den meki den tan tiri èn no span. ‘Ala sani de foe proeberi. Oenoe kon tesi srefi?’

Den no ben wani, ma professor korkori den te den alamala kon tesi srefi. Di ala sma ben kba tesi, a professor bigin lafoe den.

[p. 16]

A taki: ‘Oenoe noiti kan kon tron wan professor, bika oen no loekoe fini san mi doe. Mi pot' mi wijsfinga ini den batra, dan mi troesoe mi mindrifinga ini mi mofo.’

Den skreki di den jere foe a professor san a doe. Wantron wantoe bigin kraboe den neki èn go spiti. Trawan poti den finga ini den mofo foe braak.

Ne professor taki: ‘So a de ini a libi. A no ala san wan sma e taigi joe, joe moes doe. Joe moes arki èn loekoe boen san a sma e taigi joe.’

[p. 17]

[p. 18]