Dofi, a paiman

[p. 7]

A pisi bowtoe

Dagour ben de wan boiti boi. En papa ben abi wan gron pe a ben prani: groentoe, kasaba, napi, taja nanga wantoe sani moro, èn a ben kweki kaw nanga wan dagoe.

Dagour no ben lobi a dagoe, bikasi te den mati foe en ben wani ferferi en, den ben kari en dagoe. Èn en papa ben lobi foe prei nanga a dagoe. Ma te a dagoe ben go ini Dagour birti, a ben jagi en gwe. Dan efoe en papa ben jere, a ben bari Dagour. A dagoe den ben kari Dagoe.

So wan dei en mama ben meki roti nanga fowroe meti klari. Di Dagour kmoto foe skoro, a ben go sribi ini en kamra. En mama ben poti njanjan ini toe difrenti preti tapoe a tafra ini a koekroe, dan a tapoe den nanga wan doekoe. Di en mama kba njan, a go hari en baka ini a amaka san den ben tai ondro a manja bon sei a oso. Mama ben fergiti dagoe.

Baka wan pisten Papa doro na oso. A go wasi èn a weri krin krosi, dan a go na ini a koekroe. A loekoe tapoe a tafra. Ne di a si den preti ben tapoe nanga a doekoe, èn di a poeroe a doekoe, a no ben sabi sortoe preti ben de foe en. A bari gi Mama: ‘Soema abi den njanjan disi?’

[p. 8]

Mama san no ben sribi ete taki: ‘A wan ini a bigi preti na foe joe, èn a trawan na foe Dagour.’

Papa no ben jere Mama so boen, a jere dati a trawan na foe Dagoe. So a iti den toe roti nanga wan pi si fowroe bowtoe san Mama ben poti gi Dagour, gi Dagoe.

Dagoe noiti ben njan meti. So Dagoe san ben abi angri, njan so switi dati a go sribi tapoe a stoepoe na mofo a koekroe doro.

Di Papa kba njan, a teki wan stoeroe dan go sidon ondro a manja bon e taki tori nanga Mama.

Baka wan pisten Dagour wiki. A go loekoe wantron ini a koekroe, efoe njanjan de. Di a no si noti, a waka go na en mama. A aksi en taki: ‘Mama, pe mi njanjan de?’

Mama loekoe Papa. Papa hori en ede, dan a taki: ‘Mi mama! Mi no jere joe so boen, frow. Mi iti a njanjan gi Dagoe.’

Dagour bigin krei, bikasi a ben abi angri. Dan Papa taki: ‘Mi boi, teki wan goloe èn go bai wan bami gi joe.’

Dagour kba nanga krei. A teki a moni, dan a waka gwe. Di a doro krosbei pe Dagoe ben sribi, a teki wan tiki san ben de leti na gron dape, dan a naki Dagoe nanga a tiki. Ne Dagoe djompo opo. Fa Dagour ben wani naki Dagoe baka, Dagoe beti en na

[p. 9]

en foetoe. Dagour skreki dati a trowe a tiki, èn a lon go na Papa.

Papa san ben si ala sani, taki: ‘Joe donmankoekoe nengre joe! Efoe joe no ben naki a dagoe, a no ben sa beti joe.’

Dagour krei.

Mama taki: ‘Tan tiri, boi.’

Papa opo go teki en Eerste-Hulp dosoe, dan a poti dresi gi Dagour en foetoe, dan a seni en gwe. So sensi a dei dati, noiti moro Dagour naki a dagoe.