Dofi, a paiman

[p. 1]

Dofi, a pai man

Dofi ben de wan man san ben gebore ini pranasi. Nanga en frow a ben meki toe boi nanga toe oemapikin. Dofi ben de waktiman na a watra kantoro na ini a pranasi.

Ini december 1968, fo dei fosi njoenjari bo opo, a hindoestani wenkri ben kisi teevee. A ben de a fosi leisi ini a pranasi dati den ben kisi teevee.

So Dofi en frow, Lène, ben taigi en meki a bai wan teevee leki kado foe njoenjari gi den pikin. Dofi ben feni en wan boen prakseri.

So a tra dei Dofi go teki moni na kantoro. Di a doro drape, a taki: ‘Boen morgoe,’ dan a sori a kantoroman en wrokokarta.

Ne a man piki en: ‘Boen morgoe, meneer Dofi. Lanti no pai ete. Ma ef' joe kon tamara, dan mi denk' dati den sa pai kba.’

Dofi bigin rigeri nanga a man. Ne a taki: ‘Ala moen te twenti-na-neigi mi e kon tek' mi moni. Èn a moen disi mi wan' bai wan teevee gi den pikin foe mi. Meneer, ef joe no pai mi mi moni, mi no sab' san o psa nanga joe tide.’

Wan tra waktiman san ben kon net insei taki: ‘Dofi, sanede joe e mek' trobi nanga a man? Wins'

[p. 2]

joe rigeri te tamara mamanten, joe no man kisi joe moni.’

Ne Dofi sori a man wan kofoe, èn a taki nanga atibron: ‘Mi den e kari Dofi, a paiman.’

A waktiman bai dija foetoe, a lon gwe. Bikasi te Dofi ben taki so, dati efoe joe no lon, ai gi joe mankeri.

[p. 3]

A kantoroman bigin beifi. A taki: ‘Meneer Dofi, tangi tangi, ef' joe kon tamara, joe o kisi joe moni.’

Dan Dofi taki: ‘Meneer, ef' mi kon tamara, dan joe no gi mi mi moni, dan joe no moes de ini a pranasi moro!’ Dan Dofi waka gwe.

A tra mamanten wan ten foe aiti joeroe, Dofi doro na kantoro. Lanti ben seni moni kon na kantoro kba, so Dofi kisi en moni. So Dofi lon go esesi na a wenkri. A bai a teevee èn a go na oso. Frow Lène nanga den pikin ben breiti di den si dati Dofi ben kon nanga a teevee. Dofi no wroko a dei dati moro.

Neti joeroe Dofi, Lène nanga den pikin ben sidon ini a foroisi e loekoe teevee. So wan kawboi prenki ben drai na teevee. A prenki ben span. Toe man ini a prenki ben loeroe foe soetoe densrefi. Ne wan foe den man ben kisi wan okasi foe soetoe a trawan, san ben kibri baka wan doro.

So a prenki ben sori a gonmofo kon te na a grasi foe a teevee. Ne wan foe den boi foe Dofi bari: ‘Papa, a man wan' soet' mi kiri!’

A srefi momenti frow Lène taki: ‘Dofi, a man wan' kiri mi toe. Doe wan sani now!’

Ne den alamala go kibri ini den kamra. Dofi teki en ontigon, dan a kroipi safri baka wan

[p. 4]

stoeroe ini a foroisi. A srefi momenti a man ini a prenki soetoe a gon so: Pang.

Ne frow Lène taki: ‘Dofi, a man soet' joe?’

Dofi taki: ‘No. Mi o sori en.’

Ne Dofi marki en gon go tapoe a teevee. A man ini a prenki ben lafoe di a si dati a soetoe a trawan kiri.

Dan Dofi taki: ‘Joe wani lafoe ete. A mi den e kari Dofi, a paiman.’

Ne Dofi soetoe so: Boow. A teevee soetoe so: Boom. Èn a sei pe a teevee ben de teki faja.

Frow Lène nanga den pikin bari: ‘Jéééh. Papa soet' a man.’

Dofi taki: ‘Oen kon jep' mi. A oso e bron.’

Dan den lon go jepi Dofi esesi foe tapoe a faja. So den span anoe makandra èn kiri a faja. A kanti pe a teevee ben de, ben bron pikinso.

A oso ben kon troeboe. Ne frow Lène nanga den pikin ben krin a presi èn poti ala sani tapoe en presi. Dofi ben jepi wan anoe toe.

Di den kba foe poti ala sani tapoe en presi, a kriboi meisje foe en taki: ‘Papa, ef' joe no ben de, a man bo kiri oenoe.’

Ne Dofi lafoe èn a gi a meisje wan bosi na en seifesi. Dan frow Lène taki: ‘A sani san miti wi tide, ben de oen njoenjari kado.’ Dan den go sribi.

[p. 5]

[p. 6]