Blaka fowru nanga weti fowru

[p. 1]

Blaka Fowru nanga Weti Fowru

Wan mama fowru ben broko tu pikin, wan weti wan nanga wan blaka wan. So den tu fowru disi ben gro kon so moi. Den mama ben leri den fu du ala sani makandra. Ma Weti Fowru no ben lobi a sani dati. A no ben wani sabi taki Blaka Fowru ben de en brada.

[p. 2]

Wan dei den tu fowru ben frei gwe bun fara, te leki den kon miti wan kriki. Den go sidon tapu wan taki e teki winti. Ma baka wan pisten dan Blaka Fowru si wan woron e suku fu kroipi go na wan pikin bon na syoro. Ma Weti Fowru ben si taki wan sma ben kibri ini wan grangran leti pe a pikin bon ben de. Prefu a bari en brada taki wan sma e kibri ini a grangran, a sidon luku nomo. Fa Blaka Fowru tyopu a woron, na so a boi naki en kiri nanga wan tiki.

Weti Fowru bigin lafu, dan a frei go na oso. Di en mama no si Blaka Fowru, a ben ferstan kba san psa. A ben sari sote taki a bigin krei. Ma prefu Weti Fowru trowstu en mama, a bigin lafu. A taki: ‘Mama, yu no abi fu krei. Disi na en srefi suku. Ma mi dati, tiki no e naki mi kiri. Ai, mi brada no de moro. Now mi wawan de, dan a moro switi.’ Ma mama fowru ben e krei nomo.

[p. 3]

[p. 4]

A tra dei Weti Fowru gwe frukfruku, sondro fu taigi en mama wan sani. A go sidon tapu a srefi taki na sei a kriki. A winti ben wai so switi. Ne Weti Fowru taki: ‘Ai, baya. Na esde a boi kiri mi blaka brada. A puru don gi en.’ Dan nanga den wortu disi Weti Fowru fadon go ini wan dipi sribi.

So, a boi san ben kiri Blaka Fowru kon si Weti Fowru now na ini a bon. So a kren go safri na ini a bon. Dan fa Weti Fowru opo en ai, na so a boi naki en kiri nanga a srefi tiki di a ben kiri en brada.

Dati meki bigisma e taki: Na a srefi tiki di naki blaka fowru kiri, na a srefi tiki dati e naki weti fowru kiri tu.

[p. 5]