Anansi leri fisi

[p. 10]

Ston abi barba

Wan dei Anansi ben koiri ini a busi. Dan di ai koiri a si wan sani di noiti a ben si bifo: wan ston di abi barba. Anansi taki: ‘San, a ston abi barba!’ Fa Anansi taki a sani dati wantron en ai bigin drai èn ala sani bigin blaka gi en. Dan a fadon flaw.

Baka wan yuru so Anansi kon kisi ensrefi. En ede ben drai ete. A bigin prakseri san psa, dan a taki: ‘Mi ben waka psa, dan mi si wan sani. Mi tan tnapu dan mi taki: A ston abi barba.’ Agen Anansi fadon wantron so, brip! Dan a flaw baka.

Ma baka wan yuru di a wiki baka, dan disi leisi a ben kon sabi san psa. Anansi taki: ‘Ai, mi boi. A sani disi na wan wondru ston. Te wan sma waka psa dya èn a taki: Mmmmmmmm, dan ai fadon flaw. A bun fa mi kon sabi a sani disi èn mi sabi san mi o du.’

[p. 11]

Dan Anansi go wakawaka ini a busi te leki a kon doro na Ba Lew oso. Ba Lew ben sidon tapu en boboisturu nanga wan heri ipi yamsi na en fesi. Anansi lobi yamsi, ma a lesi fu go diki den. So Anansi taki: ‘Ba Lew, fa yu tan? A waran, yèrè! Mi e go teki wan koiri ini a kowru busi. Yu no wani kon nanga mi?’

Ba Lew taki: ‘Ai, Anansi, kon meki wi go.’

So den tu koiri wan heri pis'ten ini a busi. Dan Anansi tyari en go na a presi pe a ston di abi barba de. Dan Anansi taki: ‘Ba Lew, yu e si san mi e si?’

Ba Lew taki: ‘Ai, Anansi, a ston abi barba!’ Fa Ba Lew taki a sani dati a fadon so, brip! A flaw.

Anansi lon go wantron na Ba Lew oso dan a teki ala den yamsi fu Ba Lew tyari gwe. Baka wan yuru di Ba Lew kisi ensrefi, dan en ede ben drai. Anansi no ben de fu si moro. Dan di Ba Lew go na oso, a si taki no wan fu en yamsi ben de moro. A ben sari sote.

[p. 12]

Ma Anansi ben gridi. A no ben man wakti fu prei a triki disi go doro. A go koiri moro fara ini a busi te a kon doro na Masra Asaw oso. Masra Asaw ben sidon tapu wan sturu e hari en baka. Dan wan heri ipi bakba ben de na en fesi. Anansi lobi bakba tu, ma a lesi fu go puru. A taki: ‘Masra Asaw, fa ai go? A dei no faya tide?’

Masra Asaw piki: ‘Ai, a faya.’

Anansi taki: ‘Mi e go teki wan koiri ini a kowru busi. Yu no wani kon nanga mi?’

Masra Asaw piki: ‘Dati na wan bun sani. Mi e kon nanga yu.’

Dan so den tu gwe go koiri ini a busi. Baka di den koiri wan pisi dan Anansi tyari Masra Asaw go na a ston di abi barba. Anansi taki: ‘Masra Asaw, luku! Yu e si san mi e si?’

[p. 13]

Masra Asaw luku, a taki: ‘Ai, Anansi, a ston abi barba.’

Masra Asaw fadon so, brip, na gron. A flaw. Dan Anansi lon go es'esi na Asaw oso. A teki ala den bakba, dan a gwe.

Baka wan yuru di Masra Asaw wiki, en ede ben drai. Anansi no ben de no wan sei fu si moro. Di Masra Asaw go na oso, a si dati ala den bakba gwe. A ben sari sote.

So Anansi ben du a triki disi nanga Ba Tigri, Ba Bofru, Sisa Kaw, Sisa Agu nanga someni tra meti. Ma Dia ben kibri ala leisi na wan sei e luku san ai du. A ben wakti tapu Anansi fu leri en wan moi sani. So Dia go dipi ini a busi dan a piki someni kronto. A poti den ini wan baskita dan a tyari den go na en oso. Di a doro oso, a sidon tapu en sturu e wakti Anansi.

[p. 14]

A no kisi langa dan Anansi doro. Anansi ai ben dansi di a ben si den kronto fu Dia. Anansi lobi kronto tu, ma a lesi fu go piki den ensrefi. Dan a taki: ‘Tan, Dia, fa yu tan? A dei faya so!’

Dia du leki ai lafu, dan a piki: ‘Ai, Anansi, a faya tide. Teki wan switi krontowatra dya fu nati yu neki pikinso.’

Di Anansi kba dringi a krontowatra, a taki: ‘Mi e go teki wan koiri ini a kowru busi. Yu no wani kon nanga mi?’

Dia piki: ‘Ai, mi wani. Kon meki un gwe.’ So den tu ben waka wan moi pisi ini a kowru busi.

Baka wan pis'ten den doro na a presi pe a ston di abi barba de. Dan Anansi taki: ‘Dia, luku dape! Yu e si san mi e si?’

Dia ben sabi a triki fu Anansi so a no ben luku. A taki: ‘Anansi, mi no e si noti.’

Anansi taki: ‘Yu mus fu si en. Luku bun!’

Dia piki: ‘Mi no e si not'noti.’

[p. 15]

Anansi ati bigin bron. ‘Yu mus fu si en. Luku dyaso pe mi e sori yu. Yu e si en now?’

Dia piki en: ‘Nono.’

Anansi bigin stampu nanga en futu. A taki: ‘Yu no e si en ete? Yu no wani si a sani san mi e si! A sani dape!’

Dia piki: ‘Ooo, now mi sabi san yu wani meki mi taki. Na a sani dati mi mus taki?’

Anansi piki: ‘Iya.’

Dia taki: ‘A bun. Mi sa taki san yu wani, meki yu breiti. A no so? Dan mi e taki: A sani dape! Yu breiti, Anansi?’

Anansi bari: ‘No! Yu no mus taki: A sani dape. Ma yu mus taki san mi o taki. Yu mus taki: A ston abi barba!’

Wantron Anansi fadon so, brip! A flaw.

[p. 16]

Dan Dia lon go piki den tra meti fu den go teki den gron-nyan na Anansi oso. So den go teki ala sani san Anansi ben fufuru fu den.

Baka wan yuru Anansi kisi ensrefi. En ede ben drai. Dia no ben de fu si moro. Èn di a go na oso, a heri oso ben leigi leki fa a ben de bifo.

Ma yu denki dati Anansi ben teki leri fu a sani disi? Nono. A no e kba nanga a gridifasi fu en. Ala dei ai waka e prei den triki fu en go doro.