Anansi leri fisi

[p. 1]

Anansi leri fisi

Wan dei Anansi ben go waka na libasei, dan a si en mati Sekrepatu e waka miti en.

Sekrepatu ben e tyari wan bigi fisi ini en anu.

Anansi lobi nyan fisi, ma a lesi tumsi fu ensrefi go kisi den ensrefi. Dan Anansi taki: ‘Eee, mati Sekrepatu, pe yu feni a fisi dati?’

Sekrepatu piki: ‘Mi kisi en ini a liba.’

Dan Anansi taki: ‘Mi wani leri kisi fisi tu. Yu o wani leri mi?’

Sekrepatu piki: ‘Iya, man. Yu kan miti mi tamara mamanten na libasei, dan un sa go fisi makandra. Bika tu sma kan du a wroko fu wan sma moro esi.’

Ma Anansi no ben wani du no wan wroko. A prakseri taki: ‘Ai, Sekrepatu don, yèrè. Mi o kisi en fu a du a heri wroko, dan mi o nyan a fisi mi wawan.’

[p. 2]

Ma Sekrepatu no don soleki fa Anansi prakseri. A tra dei fruku mamanten Sekrepatu miti Anansi na libasei. A taki: ‘Anansi, yu klari kba fu un bigin?’

Anansi taki: ‘Iya. Mi e tnapu wakti yu langaten kba. Mi wani leri kisi fisi.’

Sekrepatu taki: ‘Wi o meki wan fisneti fosi. A wroko disi na wan tranga wroko. Te mi e du en misrefi, mi e wroko moi, ma baka wan pis'ten mi e kon weri. Ma fa un de nanga tu sma, dan un kan prati a wroko so: Wan fu unu kan wroko, dan a trawan o kon weri.’

Anansi taki: ‘Mi no wani kon weri. Mi sa meki a neti, dan yu kan go rostu.’

Sekrepatu taki: ‘A bun.’ A sori Anansi fa a mu brei a fisneti, dan a go kanti didon ini wan amaka na sei a liba.

[p. 3]

Anansi taki: ‘A wroko disi tranga, yèrè!’

Sekrepatu gape, a taki: ‘Mi sabi. Ai baya, mi weri.’

Anansi ben wroko tranga fu kan kba brei a neti. Ma o moro tranga Anansi ben wroko, o moro sribi ben kisi Sekrepatu. Sekrepatu gape. A hari lesi ini a amaka, dan a fadon na sribi. Baka wantu yuru Anansi kon kba nanga a fisneti. Anansi taki: ‘Sekrepatu, opo! A fisneti kba.’

Sekrepatu opo, dan a bigin e wrifi en ai. A luku a fisneti, dan a taki: ‘Anansi, a fisneti disi steifi moi. Yu kan brei neti bun, yèrè.’ Anansi bigin lafu. Dan Sekrepatu gape baka. A taki: ‘Mi sabi taki yu wroko tranga, bika mi e firi so weri. Fu tru mi weri tumsi, Anansi. Mi mus go na oso go sribi. Yere, miti mi dya tamara baka, dan wi sa kisi fisi.’

A tra mamanten Sekrepatu nanga Anansi miti baka na a srefi presi na sei a liba.

Sekrepatu taki: ‘Tide wi o seti a fisneti ini liba. A sani disi na wan tranga wroko tu. Esde yu ben wroko, dan mi ben kon weri. So tide mi o wroko, dan yu o kon weri.’

Anansi taki: ‘No, no! Mi wani wroko. Mi no wani kon weri.’

Sekrepatu taki: ‘A bun.’ Dan fa Anansi ben e seti a fisneti heri dei ini a liba, Sekrepatu kon weri taki a ben kanti didon ini a amaka te leki a fadon na sribi.

Baka wantu yuru Anansi taki: ‘Sekrepatu, opo! Mi kba seti a fisneti. Ai, mi klari fu kisi fisi.’

[p. 4]

Sekrepatu gape, a taki: ‘Mi weri tumsi fu du wan sani tide. Ma Anansi, miti mi tamara mamanten dan wi o kisi fisi.’

A tra mamanten Sekrepatu nanga Anansi miti baka na libasei. Dan Anansi taki: ‘Mi no man wakti moro langa fu kisi fisi.’

Sekrepatu piki: ‘A bun. Ma Anansi, fu kisi fisi na wan tranga wroko. Fu taki leti Anansi, den tu dei di psa yu wroko so tranga. Dat' meki mi o wroko tide, dan yu kan kon weri tu.’

Anansi taki: ‘No, no, no! Mi wani kisi fisi. Mi no wani kon weri.’

Sekrepatu taki: ‘A bun, dan na leki fa yu wani.’

Sekrepatu go didon baka ini a amaka.

Anansi wroko tranga a heri dei fu span a neti ini a liba. Dan baka wan langa pis'ten wan fisi kon fasi ini a neti. Anansi ben breiti sote dati a kisi

[p. 5]

wan bigi fisi. A bigin dyompo. A bari:

‘Sekrepatu, opo! Kon luku! Mi kisi wan bigi fisi.’

Sekrepatu dyompo opo, a taki: ‘San psa, Anansi?’

Anansi taki: ‘Luku, mi kisi wan bigi fisi. Dan san wi o du now?’

Sekrepatu gape. A taki: ‘Now wi o baka a fisi. Fu baka wan fisi na wan tranga wroko tu. Kon meki mi baka a fisi dan yu kan go rostu.’

Anansi bari taki: ‘NO!’ Bika a no ben wani prati no wan pisi fu a fisi. A taigi Sekrepatu taki: ‘Luku, mi o baka a fisi èn yu kan go hari yu baka.’

Sekrepatu now ben sidon e luku fa Anansi meki wan faya e baka a fisi. Baka wan pis'ten Sekrepatu taki: ‘Hmm, a fisi e smeri switi, yèrè! Anansi, yu sabi bori bun, man. Mi sabi taki yu e wroko tranga bika mi weri sote.’

[p. 6]

Anansi lafu, dan a taki: ‘Iya, na so a de. Efu mi no wroko tranga, mi no o nyan.’

Dan Sekrepatu taki moro fara: ‘Now a ten doro fu nyan a fisi. Te mi e nyan mi wawan, dan mi e nyan te mi bere kon furu. Ma now fa wi de tu sma, dan wi o prati a sani so: Te wan sma e nyan dan a trawan bere e furu. Dan sortu wan yu wani, Anansi?’

Anansi ben prakseri en eigi bere. Dan a piki es'esi taki: ‘Mi wani taki mi bere kon furu.’

Sekrepatu piki en taki: ‘We, dan mi o bigin nyan fosi.’

Sekrepatu bigin nyan èn Anansi go didon e wakti fu en bere kon furu. Baka wan syatu pis'ten Sekrepatu aksi: ‘Anansi, yu bere furu kba?’

Anansi piki: ‘No ete, ma nyan go doro.’

[p. 7]

Sekrepatu nyan go doro. Dan a aksi Anansi baka: ‘Yu bere furu kba?’

Anansi taki: ‘Nono, ma nyan go doro.’

Sekrepatu nyan go doro. A aksi Anansi baka: ‘Yu bere furu kba?’

Anansi piki: ‘No ete. Ma angri e kiri mi sensi di yu bigin nyan.’

Sekrepatu taki: ‘Ooo. Sari, yèrè. Ma now mi bere furu èn ala a fisi kba.’

Anansi bari taki: ‘San! Yu nyan ala a fisi? Sekrepatu, yu ori mi na spotu!’

Sekrepatu piki: ‘A no tru.’

Anansi bari moro tranga taki: ‘Iya, man! Yu meki mi du ala a wroko, dan yu wawan nyan a fisi. Mi o leri yu wan moi sani tide. Mi o go na Ba Pingo go suku leti.’ Dan Anansi lon go esi na Ba Pingo.

Ba Pingo ben sabi koti trobi bun. Ala den meti ben tyari den kragi go na en fu a krutu den. Ba Pingo aksi: ‘Anansi, san yu wani?’

[p. 8]

Anansi piki en: ‘Mi wani leti, bika Sekrepatu ori mi na spotu. Un ben go fisi, dan a kisi mi fu du ala a wroko, ma en wawan nyan a heri fisi. Sekrepatu mus kisi strafu fu a sani disi.’

Ba Pingo ben sabi fa Anansi lesi. A aksi Anansi: ‘Ma a tru taki yu ben du ala a wroko?’

Anansi piki: ‘Iya.’

Dan Ba Pingo aksi: ‘San yu du dan?’

Anansi taki: ‘Mi brei a fisneti. Mi seti en ini a liba. Mi kisi a fisi, dan mi baka en.’

Ba Pingo taki: ‘A wroko dati furu, man. Dan yu ben mus kon weri.’

Anansi taki: ‘No. Mi no ben kon weri sref'srefi. Na Sekrepatu kon weri.’

Ba Pingo ploi en fes'ede. A aksi Anansi taki: ‘Sekrepatu kon weri? Dan san a du?’

Anansi taki: ‘Noti!’

Dan Ba Pingo taki: ‘Efu Sekrepatu no du noti, dan fa a kan kon weri? Anansi, mi no e bribi yu. No wan sma e kon weri fu di a no du noti. Efu Sekrepatu kon weri dan na en ben mus du ala a wroko. A no kan. San yu taki dape no tru. Yu e lei. Kmopo na mi tapu. Go na oso èn no meki trobi moro.’

San Ba Pingo taki, tan taki. Anansi no ben kan taki noti moro. A gwe nanga sari na oso. Baka wan langa pis'ten Anansi kon taki nanga Sekrepatu baka.

[p. 9]

Ma wan bun sani ben kmopo fu a tori disi. Anansi ben leri fa fu brei neti èn fa a kan feni nyanyan. A leri den mati fu en. So den mati fu en leri den mati tu. Tapu so wan fasi ala den Anansi na heri grontapu bigin brei neti. Dat' meki te nanga a dei fu tide ala sei pe yu e feni Anansi, yu e si anansititei.