Anansi leri fisi

[p. 17]

Anansi nanga a watramun san e taki

Wan dei Anansi go sidon hei ini wan makabon e luku ini a dyari fu Asaw. Asaw ben e tyapu en watramun gron. A ben gersi taki den lepi watramun ben kari Anansi taki: ‘Luku fa unu span èn switi. Kon nyan unu, no!’

Anansi lobi fu nyan watramun, ma a lesi tumsi fu ensrefi go prani den. A son ben opo moi na loktu èn a dei ben kon waran. Na so Anansi ben sidon ini a makabon e luku. Di brekten doro a ben faya tumsi fu wroko ini a son, so Asaw poti en tyapu na wan sei dan a go bro pikinso ini en oso.

Na disi Anansi ben wakti someni langa. A broko wan maka dan a dyompo go ini a gron fu Asaw. A boro wan olo nanga a maka ini a moro bigi lepi watramun. Dan a kwinsi ensrefi go ini a watramun. Anansi bigin nyan te leki en bere kon

[p. 18]

lontu leki wan bal. Dan a taki: ‘Ai, mi bere furu moi kba. Mi o gwe, bika dyonsro Asaw o kon baka.’

Ma di Anansi suku fu kwinsi ensrefi kmoto ini a olo, a no ben kan psa moro, bika a ben nyan tumsi furu. A ben fatu tumsi fu kmoto ini a olo. Dan Anansi bigin krei. A taki: ‘Mi fasi. Mi no kan kmoto dya te leki mi kon mangri baka.’

Dan Anansi sidon wakti fu kon mangri baka. A ten ben e gwe safrisafri. Anansi bari taki: ‘Mi e ferferi, man. Mi winsi taki mi ben kan du wan sani.’

Leki fa Anansi kba taki, so a yere Asaw e waka kon. Dan Anansi kisi a prakseri taki: ‘Te Asaw kon krosbei mi o taki wan sani. Dan a o denki taki na a watramun e taki.’

Di Asaw doro ini en watramungron, en ai fadon wantron tapu a watramun pe Anansi ben de. Asaw piki a watramun dan a taki: ‘Ai, luku fa yu bigi èn lepi so moi.’

[p. 19]

Dan Anansi bari taki: ‘Ooo!’

Asaw dyompo. A taki: ‘Eee! Suma taki dape?’

Anansi piki taki: ‘Na mi, a watramun.’

Asaw taki: ‘Mi no ben sabi taki watramun kan taki.’

Anansi piki: ‘Iya, ala ten wi ben taki. Ma yu no e arki.’

Asaw taki: ‘Mi no kan bribi san mi e yere dya nanga mi yesi. Wan watramun e taki? Suma o wani bribi a sani disi? Mi mus go sori Kownu a sani disi.’

Asaw bigin lon gwe nanga a watramun ini en anu fu go na kownu. Baka wan pis'ten Asaw miti en mati Bofru tapu pasi. Bofru aksi en taki: ‘Pe yu e lon go nanga so wan moi watramun?’

Asaw piki taki: ‘Mi e tyari en go gi Kownu.’

[p. 20]

Bofru taki: ‘Fu sanede, dan? Kownu abi moro leki wan hundro watramun.’

Asaw taki: ‘Ma a watramun disi kan taki!’

Bofru no ben bribi Asaw. A taki: ‘Wan watramun di e taki? Dati no kan!’

Dan Anansi taki: ‘Yu mangri Bofru, yu!’

Wantron Bofru ati bigin bron, taki en heri fesi kon redi. A taki: ‘Suma taki dati? Asaw, na yu ben taki dati?’

Asaw piki taki: ‘A no mi! Mi taigi yu taki a watramun disi kan taki. Yu e bribi mi now?’

Bofru taki: ‘Iya, mi e bribi yu. Dan mi sa kon nanga yu. Mi wani yere san Kownu o taki te yu gi en a watramun di e taki.’

Asaw taki: ‘Kon un gwe.’

So Asaw nanga Bofru teki pasi fu go na Kownu. Makandra den tyari a watramun moro fara. Baka wan pis'ten den miti Ba Pingo. Ba Pingo taki: ‘Pe unu e tyari a watramun go?’

[p. 21]

Den piki: ‘Wi e tyari en go na Kownu.’

Ba Pingo taki: ‘Ma fu sanede, dan? Kownu abi someni watramun.’

Dan Bofru piki taki: ‘Ma a no abi wan leki disi. A wan disi kan taki!’

Ba Pingo taki: ‘San! Fa dati kan, wan watramun e taki? A no kan!’ Dan a bigin bari lafu.

Dan Anansi taki: ‘Yu don Pingo yu! Fa yu e lafu so leki wan lawman?’

Ba Pingo kba lafu wantron. A bigin kuku fu atibron. A bari taki: ‘Suma taki a sani dati? Asaw, na yu? Bofru, na yu?’

Den piki en taki: ‘Nono, a no unu taki en. Na a watramun taki so. Yu srefi yere. Yu e bribi un now?’

Ba Pingo taki: ‘Iya. A bun. Mi o kon nanga unu. Mi wani si fa Kownu o du te wi o sori en a watramun disi di kan taki.’

[p. 22]

So Asaw, Ba Pingo nanga Bofru syow a watramun makandra go moro fara. Di den ben de na pasi, den kon miti Sekrepatu, Dia nanga Konkoni. Den srefi no ben wani bribi dati a watramun ben kan taki. Ma di den yere a watramun taki, dan den ben teki bribi. Dan den srefi bigin waka nanga den tra meti. Di den doro na Kownu, dan Asaw go na fesi. A boigi fesi Kownu, dan a poti a watramun na Kownu futu. Kownu luku a watramun, dan a taki: ‘Fu sanede yu tyari wan watramun gi mi? Mi abi someni watramun ini mi gron.’

Asaw piki: ‘Mi lespeki Kownu, ma yu no abi a wan disi. A disi kan taki.’

Kownu taki: ‘Wan watramun san e taki? Mi no kan bribi dati.’ Dan Kownu pusu a watramun nanga en futu. A taki: ‘Watramun, taki wan sani!’

Ma a watramun tan pii. A no taki not'noti.

[p. 23]

Dan Kownu opo en sten, a taki: ‘Watramun, yu no abi fu syen. Yu kan taki san yu wani. Mi wani yere nomo taki yu e taki.’

Ma a watramun no piki Kownu sref'srefi.

Kownu no ben abi pasensi moro. En ati bigin bron. A taki: ‘Watramun, efu yu kan taki, dan taki! Kon meki mi yere.’

A watramun no taki not'noti.

Kownu ai kon redi now. A taki: ‘Mi e komanderi yu fu yu taki!’

Ma a watramun no taki noti.

Dan Kownu taki: ‘Yu don watramun, yu!’

Ne a watramun piki taki: ‘A no mi don. Na yu don. Na yu e taki nanga watramun!’

Kownu ati bron taki en heri skin bigin beifi. Noti ete den meti ben si fa Kownu ben atibron so. Kownu bari taki: ‘Mi a no wan sma di e taki nanga watramun. A watramun disi no abi lespeki gi mi.’

[p. 24]

Kownu teki a watramun, dan a fringi en gwe nanga ala en krakti. A watramun lolo go te na ini a gron fu Asaw. A naki na a bigi makabon panya, so Anansi kon kmoto ini a watramun. A soktu dipi. Dan a go tnapu sei wan bakbabon. Anansi ben kon mangri fu ala den triki san a ben du. Now angri bigin kiri en baka. Dan Anansi kren go ini a bakbabon. A go sidon leti mindri wan bigi bosu lepi bakba dan a bigin nyan.

Baka wan pis'ten Asaw kon doro na oso. A waka go langalanga na ini en watramun gron, dan a taki: ‘Un watramun, un tyari mi go ini bigi problema nanga Kownu. Bigin fu now, mi no o arki not'noti san un e taki!’

Anansi bari kmoto fu a bakbabon taki: ‘Asaw, a bun taki yu kon sabi dati. Wi leki bakba ben mus fu warskow yu. Watramun san e taki na soso problema.’