Cesare Ripa's Iconologia of Uytbeeldinghen des Verstants

Musen
Geschildert van den Cardinael van Ferrare in zijn Hof te Monte-Cavallo.

Clio.

Sal mette rechter hand een Trompet, en met de slincker een Boeck houden, en van dieselve sijde sal een kindeken staen, dat in beyde handen een ontsteecken Fackel heeft, met een kransken op 't hoofd.

Euterpe.

Sal met beyde handen een grijns of momaensicht houden.

Thalia.

Sal mette rechter een grijns met hoornen houden, en mette slincker een Overvloets-hooren vol blaeders en kooren-ayren, doch groen, voor haere voeten sal een ploegh leggen.

Melpomene.

Sal mette rechter hand een Momaensicht en in de slincker een Trompet houden, leggende op der aerde, een opgeslagen Musijc-boeck.

Terpsichore.

Sal mette slincker hand een Liere, en mette rechter een strijckstock houden.

Erato.

In de rechter hand den Hooren van Rijckdom vol bladen, bloemen en verscheyden vruchten, in de slincker een fluyt. Van die sijde sal Cupido staen, die mette slincker een grijns houd, en in de rechter een boge, daer van de snaere los is.

[p. 338]

Polyhymnia.

Houd in de rechter hand een Maetstock, in de slincker een Mom, en ter aerden leyt een ploegh.

Calliope.

Houd mette rechter hand een boeck, met de slincker een dwarspijp, en op der aerde een Momaensicht.

Vrania.

Houd mette rechter hand een wit tafereel, daer op zy mette sijde leunt, en in de slincker heeftse een spiegel.